Rusiya aprelin 20-də Sarmat qitələrarası ballistik nüvə raketini sınaqdan çıxarıb. Rusiya prezidenti Vladimir Putin deyib ki, ölkənin nüvə cəbbəxanasına əlavə olunan bu raket Moskvanın düşmənlərinə fikirləşmək üçün mövzu verəcək.

“Reuters” yazır ki, Rusiya dövlət telekanallarında yayımlanan süjetdə ölkənin hərbi rəhbərliyi Putinə raketin Rusiyanın şimal-qərbindəki Plesetsk bazasından atıldığı və Uzaq Şərqdə Kamçatka yaxınlığındakı şərti hədəfi vurduğu barədə məruzə edib.

Putin bir daha xatırladıb ki, bu raketin bütün dünyada analoqu yoxdur:

"Yeni kompleksin ən yüksək taktiki və texniki xarakteristikaları var və o bütün müasir raket hücumundan müdafiə sistemlərinə üstün gəlməyə qabildir. Onun bütün dünyada analoqu yoxdur və qarşıdan gələn uzun müddətdə olmayacaq”.

***

Putin əlavə edib ki, bu unikal silah Rusiya silahlı qüvvələrinin potensialını gücləndirəcək: “Raket Rusiyaya xarici təhlükəsizlik hədələrindən etibarlı müdafiə verəcək və aqressiv ritorikada ölkəmizi hədələyənləri düşünməyə vadar edəcək”.

ABŞ Konqresi Tədqiqat Mərkəzinin məlumatına görə Sarmat yeni ağır qitələrarası ballistik raketdir və Rusiya hər raketə 10 və daha çox nüvə başlığı yerləşdirməyi planlaşdırır.

“Reuters” yazır ki, bu raket uzun illərdir tikilməkdəydi və bu mənada Qərb üçün sürpriz olmayıb, lakin Putinin bəyanatı Rusiyanın Ukraynaya təcavüzü ilə bağlı yaranmış gərgin geosiyasi şəraitə təsadüf edir.

Rəsmi adı RS-28 Sarmat olan bu raket NATO-nun təsnifatında SS-X-29 və ya SS-X-30 adlandırılır, Qərbdə jarqon dilində Satan II kimi tanınır.