Birləşmiş Millətlər Təşkilatı (BMT) Ukraynadakı müharibədə 11 min 700 mülki vətəndaşın öldüyünü açıqlayıb. Ekvador və Fransanın tələbi ilə BMT Təhlükəsizlik Şurasında Rusiyanın Ukraynada mülki əhaliyə və mülki infrastrukturlara hücumları ilə bağlı sessiya keçirilib.

BMT baş katibinin humanitar məsələlər üzrə müavini Coys Msuya burada üzv ölkələri məlumatlandıraraq, Ukraynada vəziyyətin getdikcə pisləşdiyini diqqətə çatdırıb.

***

Msuya, ölənlərin sayının artdığını və insanların əzabının “dözülməz həddə” çatdığını, indiyədək 11 min 700 dinc sakinin həyatını itirdiyini, 24 min 600 mülki vətəndaşın isə yaralandığını bildirib.

Ukraynada 10 milyon insanın məcburi köçkünə çevrildiyinə diqqət çəkən Msuya, 26 avqustdan bu yana Ukraynanın hər yerində genişmiqyaslı hücumların davam etdiyini, Ukrayna-Rusiya sərhədindəki qarşıdurmanın yeni bölgələrə sıçradığını və bu vəziyyətdən dərin narahat olduqlarını bildirib.

Msuya bəyan edib ki, Ukraynanın Kursk vilayətində aparılan hərbi əməliyyatlar nəticəsində 130 min insan didərgin düşüb. Burada da mülki şəxslərə və infrastrukturlara hücumlar olduğuna diqqət çəkən Msuya, “Bütün tərəflər beynəlxalq humanitar hüquqa uyğun olaraq mülki şəxsləri və əmlakı qorumalıdır”, – deyib.

***

Msuya bildirib ki, hərbi fəaliyyətlərin artması humanitar əməliyyatları gərginləşdirir və işçiləri təhlükə altına alır.

Bu il Ukrayna üçün açıqlanan humanitar yardım fonduna 1,4 milyard dollar yatırıldığını bildirən Msuya, bunun qeyri-kafi olduğunu və Ukrayna daxilində 14,6 milyon insanın yardıma ehtiyacı olduğunu bildirib.

Msuya BMT Baş Assambleyasının 79-cu sessiyasına hazırlaşan üzv dövlətlərin liderlərini Ukraynada müharibəyə son qoymaq üçün bütün imkanlardan istifadə etməyə çağırıb.