ABŞ da miqrasiya polisi, heç bir cinayət törətməmiş, lakin ölkədə qanunsuz yaşayan miqrantların iş yerlərini müəyyən edərək onlara qarşı əməliyyatları intensivləşdirib.

Belə ki, Miqrasiya İdarəsinin polis əməkdaşları Filadelfiyada bir marketə əməliyyat keçirərək, orada iş icazəsi olmadan satıcı işləyən bir qrup qanunsuz miqrantı saxlayıb. Onlar barəsində deportasiya qərarı verilib. Gözlənilir ki, gün ərzində hava yolu ilə öz ölkələrinə göndəriləcəklər.

Mağaza sahibi, ABŞ vətəndaşı olduğu üçün, qanunsuz işçi çalışdırdığına görə cərimələnib. Ona bu halın təkrarlanacağı təqdirdə ciddi hüquqi nəticələrlə üzləşəcəyi barədə xəbərdarlıq edilib və o, sərbəst buraxılıb.

Xidmətin verdiyi məlumata görə, saxlanılan şəxslər bir neçə Latın Amerikası ölkəsinin vətəndaşlarıdır və araşdırmalar nəticəsində heç bir cinayət törətmədikləri müəyyən edilib.

Qeyd edək ki, cinayət törətmiş və axtarışda olan qeyri-qanuni miqrantlar Quantanamo həbsxanasına göndərilir. Heç bir cinayət törətməmiş miqrantlar isə öz ölkələrinə deportasiya edilir.

Bildirilir ki, deportasiya qorxusuna görə ölkədə milyonlarla qanunsuz miqrant gizlənərək işləməkdən imtina edir. Bunun nəticəsində xüsusilə xidmət sektorunda (restoran, ev işləri, tikinti və s.) ciddi işçi çatışmazlığı yaranıb.