Polşada Radom Beynəlxalq Aviaşousunun məşqində ağır qəza baş verib. Polşa Hərbi Hava Qüvvələrinin nümayiş qrupu Tiger Demoya məxsus “F-16” döyüş təyyarəsi sınaq uçuşu zamanı yerə çırpılıb. Təyyarə alov topuna dönüb, pilot isə həyatını itirib.

Hadisə Radom Hava Limanında baş verib. Təyyarənin qəzaya uğramasından sonra enmə zolağı tamamilə yararsız hala düşüb. Qəza anı şahidlər tərəfindən videoya çəkilib.

Polşanın hökumət sözçüsü Adam Şlapka (Adam Szlapka) pilotun öldüyünü təsdiqləyib və Müdafiə naziri Vladislav Kosinyak-Kamış (Wladyslaw Kosiniak-Kamysz) hadisə yerinə yollandığını açıqlayıb.

Yerli media məlumat verir ki, baş vermiş faciə səbəbindən bu həftə sonu keçirilməsi planlaşdırılan Radom Beynəlxalq Aviaşousu ləğv olunub. Qəzanın səbəbi hələlik müəyyənləşdirilməyib.

Qeyd edək ki, Radom aviaşousunda daha əvvəl – 2007-ci ildə baş vermiş qəzada da iki pilot həyatını itirmişdi.