İtalyanlar Paolo Sorrentinonu sevir...

Rejissor Paolo Sorrentinonun son filmi “La Grazia” 82-ci Venesiya Film Festivalının açılışında nümayiş olunub və dəqiqələrlə ayaqüstü alqışlanıb. İki gün əvvəl Lido adasında keçirilən premyerada film 4 dəqiqəlik coşqulu alqış tufanı ilə qarşılanıb.

Ekran əsəri yaşlanmaqda olan bir siyasətçinin ölümü ilə üzləşərkən vəzifədəki son günlərində iki əfv dosyası barədə qərar verməsinindən bəhs edir. Sorrentino nümayişdən sonra tamaşaçılara salamlayaraq əlini ürəyinin üstünə qoyub. Zalın böyük hissəsini italyan rəsmiləri və kino sənayesi təmsilçiləri təşkil etsə də, Tilda Svinton və Keyt Blanşett kimi ulduzlar da gecədə iştirak ediblər.

“La Grazia” Sorrentinonun illərdir birgə işlədiyi italyan aktyoru Toni Servillo ilə 8-ci əməkdaşlığı olub. 66 yaşlı Servillo, katolik bir ölkədə ötanaziyaya icazə verəcək qanun layihəsini imzalayıb-imzalamamaq dilemması yaşayan İtaliya prezidenti Mariano De Santisi canlandırır.

2001-ci ildə “L’uomo in più” ilə Venesiyada ilk dəfə diqqət çəkən Sorrentino, “Variety”yə açıqlamasında filmdə müsbət bir siyasətçi portreti göstərmək istədiyini deyib: “Hər gün xəbərlərdə siyasətçilərin əsəbiliklə, güc nümayişi ilə və ya iqtisadiyyata dair qəribə ideyalarla verdikləri qərarları oxuyuruq. Mən bunun əvəzinə siyasətçinin necə olması gərəkdiyini göstərmək istədim”.

Film müsabiqə bölməsində təqdim olunur və ilkin rəylər olduqca müsbətdir.

“Deadline”dan Pit Hammond yazıb ki, “Sorrentino həm İtaliyada, həm də ABŞ-dakı siyasi atmosferdən təsirlənərək yenidən əxlaqlı liderlik haqqında düşündüyünü göstərir”. O, Toni Servillonun oyununa heyranlığını bildirib: “Sorrentino karyerasında bir çox gözəlliyə imza atıb. “La Grazia” onların ən yaxşılarından biridir. “Oscar”a namizəd olmalıdır.”

“Guardian”dan Piter Bredşou isə vurğulayıb ki, Sorrentino “Su Pərisi Parthenope” filmindən sonra yenidən öz üslubunu tapıb: “Provosativ yumorunu, sürreal səhnələr yaratmaq bacarığını və təbii tərzini geri qaytarıb. Film bəlkə də rejissorun düşündüyü qədər dərin məna daşımır, amma həyəcanlı, möhtəşəm və Sorrentinonun italyan kinosunda Antonioninin varisi olduğunu sübut edir”.

“The Playlist” filmi “B” balı ilə qiymətləndirərək, “Sorrentino cazibəsini daşıyan, bəzən oyunbaz, bəzən dərin düşüncəli; izlənməyə dəyər bir əsər”, – deyə yazıb

“The Film Stage” isə rejissorun vizual zərifliyini önə çəkib: “Möhtəşəm Gözəlliyi (“La Grande Bellezza”) sevənlər, bu incə işlənmiş, amma daha sakit tempolu dramadan zövq alacaq. Anlatmadakı qüsurlara baxmayaraq film tamaşaçını əsla sıxmır. Dariya D’Antonionun kamerası gözlərinizi yumşaq bir yorğan kimi bürüyür”.

82-ci Venesiya Film Festivalı sentyabrın 6-na qədər davam edəcək.

“La Grazia” İtaliya və İspaniyada 15 və 16 yanvar 2026-da nümayiş olunacaq. Filmin Azərbaycanda vizyona girib-girməyəcəyi hələ məlum deyil.