Almaniyada bir çox şirkət işçilərini ixtisar edərkən, sualtı qayıq istehsalçısı “Thyssenkrupp Marine Systems” (TKMS) məşğulluqda böyük artıma hazırlaşır. Şirkət növbəti beş il ərzində Vismardakı gəmiqayırma zavodunda 1500 yeni işçi işə götürməyi planlaşdırır. Müraciətlər çərşənbə axşamı başlayır. Hazırda gəmiqayırma zavodunda cəmi 100 nəfər çalışır.

Meklenburq-Ön Pommern əyalətinin Baltik dənizi sahilində yerləşən Vismar şəhərindəki gəmiqayırma zavodu bu il təxminən 100 yeni gəmiqayırma işçisi işə götürməlidir. Növbəti illərdə isə hər il ən azı 300 yeni işçinin işə götürülməsi qarşıya məqsəd qoyulub. Bundan əlavə, hər il 60-a qədər tələbə işə cəlb ediləcək.

Məşğulluq bumunun əsas səbəblərindən biri Almaniya ordusunun (Bundesver) təcili modernləşdirilməsinə ehtiyacdır. 2024-cü ilin sonuna qədər Almaniya Bundestaqının Büdcə Komitəsi Almaniya Hərbi Dəniz Qüvvələri üçün dörd yeni nəsil 212 CD sinifli sualtı qayığın tikintisini təsdiqləyib. Təkcə Almaniya üçün bu layihə üçün sifariş həcmi 4,7 milyard avrodur.

212 CD sinifli sualtı qayıqların uzunluğu təxminən 73 metr, eni isə 10 metr olacaq. Lakin bu layihəyə başlamazdan əvvəl gəmiqayırma zavodunun texniki cəhətdən yenidən qurulması lazımdır. TKMS bu transformasiya üçün təxminən 200 milyon avro sərmayə qoymağı planlaşdırır.

TKMS, əvvəlki sahibi “Genting” (Honq Konq) 2022-ci ilin dekabrında müflis olduqdan sonra vismardakı tərsanəni ələ keçirdi. Həmin vaxt gəmiqayırma zavodu maliyyə çətinlikləri səbəbindən bağlanmışdı.

Vismarda sifarişlərin artması təkcə sualtı layihələrlə məhdudlaşmır. Eyni zamanda burada qütb tədqiqatları üçün yeni gəmi tikilir. “Polarstern” adlı bu yeni tədqiqat gəmisi üçün ümumi sifariş həcmi təxminən 1,5 milyard avrodur.