Avropa sanki müharibəyə hazırlaşırmış kimi davranmaqda davam edir. Qitədə təhlükəsizliklə bağlı narahatlıqlar artır. Almaniyada Daxili İşlər Nazirliyi məktəblər üçün fövqəladə hallara hazırlıq təlimini tövsiyə edir.

Federal Daxili İşlər Nazirliyi gənclərin məktəblərdə böhranlara və müharibə ehtimalına hazırlanmasının tərəfdarı olduğunu bildirib. Nazirlik sözçüsü Handelsblatt, “Təhlükəsizlik vəziyyətindəki son inkişaflar fonunda, mülki müdafiəyə, o cümlədən məktəb təhsilinə daha çox diqqət yetirilməlidir”, – deyib.

Daxili İşlər Nazirliyi qeyd edir ki, məktəblərdə “təhsilin məzmununun müəyyən edilməsi” federal ştatların üzərinə düşür. Bununla belə, federal hökumətin və Mülki Mühafizə və Fəlakətlərə Yardım üzrə Federal İdarənin (BBK) “gənclər və müəllimlər üçün materiallar”la köməklik göstərməyə hazır olduğu bildirilib.

Nazirlik həmçinin Aİ Komissiyasının bu yaxınlarda təqdim etdiyi “müharibə ilə bağlı böhranlara hazırlıq” təşəbbüsünü alqışlayıb və vətəndaşlara su, ərzaq və digər zəruri mallar ehtiyatı saxlamağı tövsiyə edib. “Minimum 72 saatlıq tədarüklə müvəqqəti böhran vəziyyətlərini yaxşı idarə etmək olar”, – sözçü deyib.

CDU təhlükəsizlik siyasətçisi Roderix Kizevetter də məktəblilərə böhran təhsili verməyi təklif edib. “Fövqəladə hallarla məşğul olmaq vacibdir, çünki tələbələr xüsusilə həssasdırlar və fövqəladə hallarda xüsusilə təsirlənirlər”, – siyasətçi deyib.

Kizevetterə görə, fəlakət vəziyyətlərində davranış üzrə əsas təlimlər də verilməlidir. Kizevetter Finlandiyanı misal çəkərək, bu təcrübənin onilliklər ərzində məktəblərdə adi olduğunu qeyd edərək, “Bu, həm də icma xidməti baxımından ağıllı və gələcəyə hesablanmış olardı”, – deyib.