Avropada satılan bəzi suşi düyüsü məhsulları ilə bağlı təhlükəsizlik narahatlığı yaranıb. Asiya məhsulları şəbəkələrində satılan “Shinode Original Premium Sushi Rice” məhsulu tərkibində mineral yağ mənşəli maddələrin aşkarlanmasından sonra geri çağırılıb.

VAXT.AZ Lebensmittelwarnung.de xəbər portalına istinadən xəbər verir ki, məhsulun distribyutorları olan “Go Asia” və “Orient Master GmbH” istehlakçılara məhsuldan istifadə etməmək və onu mağazalara geri qaytarmaq çağırışı edib.

Almaniya mediasının məlumatına görə, geri çağırılan məhsulun idxalçısı Hollandiyada yerləşən “Asia Express Food B.V.” şirkətidir. Ekspertlər həmin məhsulun bir çox Avropa ölkələrində də satışda ola biləcəyini istisna etmirlər.

Rəsmi açıqlamalarda qeyd olunur ki, məhsulda MOSH və MOAH adlanan mineral yağ mənşəli karbohidrogen birləşmələri aşkarlanıb. “Federal Institute for Risk Assessment” bildirir ki, bu maddələr əsasən qablaşdırma materiallarından qidaya keçir. Xüsusilə təkrar emal edilmiş karton və çap mürəkkəbi qalıqları risk mənbəyi hesab olunur.

Mütəxəssislər vurğulayırlar ki, düyü, un və manna yarması kimi quru ərzaq məhsulları bu tip çirklənməyə daha həssasdır. Onların fikrincə, MOSH maddələrinin qısa müddətdə ciddi təhlükə yaratdığı tam sübut olunmasa da, MOAH qrupuna daxil olan bəzi komponentlərin genetik dəyişikliklər və xərçəng riski ilə əlaqəli ola biləcəyi ehtimal edilir.

Avropa Komissiyası hələlik bu maddələr üçün yekun limit müəyyən etməyib. Bununla belə, müəyyən həddən yüksək MOAH aşkarlanan məhsulların bazardan çıxarılması tövsiyə olunur.

Şirkətlər məhsulu alan şəxslərdən düyüdən istifadə etməməyə və onu satış nöqtələrinə qaytarmağa çağırıb. Bildirilir ki, məhsullar qəbz olmadan da geri qəbul edilə bilər və ödənilən məbləğ tam şəkildə qaytarılacaq.