Rusiya Finlandiya sərhədi yaxınlığındakı bazalarını möhkəmləndirdikdən sonra Helsinki administrasiyası hərəkətə keçdi. “Finlandiya Ukraynada müharibə bitdikdən sonra Rusiyanın öz sərhədinə daha çox qoşun yeridəcəyinə inanır”, – “The Guardian” yazır.

Finlandiya Müdafiə Qüvvələrinin strategiya rəhbəri general-mayor Sami Nurmi deyib ki, hərbçilər Moskvanın manevrlərini “çox yaxından” izləyir və onların vəzifəsi “ən pisə hazırlaşmaq”dır.

Helsinki administrasiyasının dünən verdiyi açıqlamada, Rusiya ilə şərq sərhədində planlaşdırılan 200 kilometrlik hasarın ilk 35 kilometrinin tamamlandığı açıqlanıb. Finlandiya keçən il Kremlin miqrantları ölkəyə qəsdən yönləndirdiyini iddia edərək sərhədini bağlamışdı.

Nurmi deyir ki, hələ narahat olacaq bir şey yoxdur, Finlandiya və NATO təhlükədə deyil. Bununla belə, o əlavə edib ki, Rusiya öz hərbi gücünü tədricən inkişaf etdirəcək: “Siz düşünməlisiniz ki, onlar Ukraynaya daha çox qoşun göndərməyə hazırlaşırlar, yoxsa bizim sərhədimizə yaxınlaşaraq qüvvələrini artırmağı planlaşdırırlar. Amma düşünürəm ki, hər ikisini edirlər”.

“The New York Times” mayın 19-da yazıb ki, Rusiya Finlandiya sərhədi yaxınlığında bazalarını möhkəmləndirir. NATO rəsmilərinin təsdiqlədiyi fotolarda yeni çadırların qurulduğu, hərbi maşınların saxlanması üçün yeni anbarların tikildiyi, döyüş təyyarələrinin anqarlarının yeniləndiyi və uzun müddət istifadə olunmayan helikopter bazasının əsaslı təmir edildiyi göstərilir.

Helsinki administrasiyası 2022-ci ildə Ukrayna müharibəsi başlayandan sonra hərəkətə keçib və iki il əvvəl NATO-ya üzv olub.

Nurmi onu da xatırladır ki, Moskva Finlandiya NATO-ya daxil olduqdan sonra hərbi mövqeyini dəyişməyə başlayacağını bəyan edib.

Finlandiya Qadınların Milli Fövqəladə Hallara Hazırlıq Assosiasiyası (Nasta) Ukrayna müharibəsindən sonra qadınlara ilk yardım və silah təlimi verməyə başladı. Rəsmilər təlimə marağın davam etdiyini, əksər kursların üç-dörd dəqiqəyə dolduğunu deyirlər.

Finlandiya da bazar ertəsi elan edib ki, dondurulmuş Rusiyanın aktivlərindən 90 milyon avro istifadə edərək Ukraynaya sursat tədarük edəcək.