Cənubi Koreya Milli Kəşfiyyat Xidmətinin (NIS) məlumatına görə, Moskva qüvvələri iyul və ya avqust aylarında Ukraynaya qarşı genişmiqyaslı hücuma keçə bilər.

Cənubi Koreyalı millət vəkili Li Şonq-Kvenin kəşfiyyat xidmətinə əsaslanaraq paylaşdığı məlumata görə, Şimali Koreya Rusiyaya göndəriləcək əsgərləri işə götürməyə başlayıb.

NIS bağlı qapılar arxasında Cənubi Koreya siyasətçilərinə verdiyi açıqlamada Şimali Koreyanın iyul və ya avqust aylarında Rusiyaya əlavə 6 min hərbi qulluqçu göndərəcəyini bildirib.

Seulun hesablamalarına görə, əlavə qoşun yerləşdirilməsi Şimali Koreyanın artıq təmin etdiyi dəstəyə, o cümlədən iqtisadi və texniki yardım müqabilində 10 milyondan çox artilleriya mərmisi və ballistik raketlərin ötürülməsinə əlavə olunacaq.

Şimali Koreya lideri Kim Çen In ötən həftə Pxenyanda Rusiya Təhlükəsizlik Şurasının katibi Sergey Şoyqu ilə görüşüb.

***

Cənubi Koreya Milli Kəşfiyyat Xidmətinin hesabatına görə, Pxenyan həmçinin Tatarıstandakı Alabuqa Xüsusi İqtisadi Zonasında pilotsuz təyyarələrin istehsalını dəstəkləmək üçün Rusiyaya 25 minə qədər işçi göndərə bilər.

Bunun müqabilində Şimali Koreyanın pilotsuz uçuş aparatları üzrə təlim keçmək istədiyi və qabaqcıl pilotsuz uçuş imkanlarını öz hərbi arsenalına inteqrasiya etmək üçün səy göstərdiyi bildirilir.

***

Müdafiə naziri Rüstəm Ömərov dünən keçirdiyi mətbuat konfransında bildirib ki, Şimali Koreya Ukraynaya qarşı 11 minə yaxın elit hərbçi yerləşdirib və bu, Şimali Koreya lideri Kim Çen Inın “elit şəxsi ehtiyat qüvvələrinin” 20 faizindən çoxunu təşkil edir.

“Bunlar fiziki, psixoloji və digər meyarlar əsasında xüsusi seçilmiş əsgərlərdir. Bu bölmələr artıq xeyli itki verib”, – Ömərov əlavə edib.

Böyük Britaniyanın müdafiə kəşfiyyat agentliyinin 15 iyun tarixli hesabatına görə, Şimali Koreya 2024-cü ilin payızında Kursk vilayətinə qoşun yeritdikdən sonra Rusiyada 6000-dən çox itki verib.