Fransada satılan “Lay’s” markalı çiplər, tərkibində Avropa Birliyində qadağan olunmuş kanserogen maddələrin olması səbəbilə geri çağırılır.

Fransanın ictimai məlumat platforması “Rappel Conso”, 3 iyul 2025-ci ildə Lay's markasına aid bəzi mini çip paketlərində kanserogen maddələrin aşkar edildiyini açıqladı.

Geri çağırma “Action” mağazasında 3016891 istinad nömrəsi ilə satılan məhsulları əhatə edir. Çiplərin istehsal tarixi 23 may – son istifadə müddəti isə 23 avqustdur.

Məhsullarda MOSH və MOAH adlı qeyri-ərzaq mineral yağlar aşkar edilib. Avropa Birliyi tərəfindən icazə verilməyən bu maddələrin uzunmüddətli xərçəng riski daşıdığı, genetik quruluşu zədələdiyi və hormonal sistemə mənfi təsir etdiyi bildirilir.

“Foodwatch” müstəqil audit təşkilatının məlumatına görə, bu maddələr sonsuzluğa və erkən cinsi yetkinliyə səbəb ola bilər, anadangəlmə qüsurları olanlarda metabolik xəstəliklərə (məsələn, şəkərli diabet) səbəb ola bilər. Bu yağların qaraciyər, dalaq kimi orqanlara yığılıb zərər verə biləcəyi də bildirilir.

***

“Rappel Conso” qeyd olunan məhsulların dərhal geri qaytarılmasını və istehlak edilməməsini tövsiyə edir. Məhsulları qaytaran müştərilərin pullarının geri qaytarılacağı da açıqlanıb. Bildirilib ki, geri çağırış prosesi 2025-ci il sentyabrın 2-dək davam edəcək.