Rusiya Xarici İşlər Nazirliyindən verilən açıqlamaya görə, Lavrov Braziliyanın ev sahibliyi ilə Rio-de-Janeyroda keçirilən 17-ci BRİCS Liderlər Zirvə toplantısına qatılıb.

Sammitin ikinci iclasında çıxış edən Lavrov, çoxqütblü dünya nizamının qurulmasının vacibliyini vurğulayaraq, “Çoxqütblülük seçim deyil, müstəmləkəçiliyə əsaslanan köhnə liberal modeli əvəz edən bir reallıqdır”, – deyib.

ABŞ dolları ilə ödənişlərə inamın sarsıldığını vurğulayan Lavrov, “İnkişaf etmiş ölkələrdə belə vəziyyət nəzarətdən çıxır. ABŞ-ın dövlət borcu 37 trilyon dollarlıq rekord həddə çatıb və böyüməkdə davam edir. Ona görə də qlobal əksəriyyətin Qərbdən asılı olmayan inkişaf mexanizmlərində maraqlı olması təəccüblü deyil. Qlobal cənub və şərq ölkələri qlobal iqtisadi artımın əsas hərəkətverici qüvvəsinə çevrilib”, – deyib.

Lavrov bu vəziyyətdə regional təşkilatların rolunun artdığını və bu baxımdan BRİCS-in liderlik etdiyini bəyan edib: “BRICS universallıq, şəffaflıq və bərabərlik prinsiplərinə əsaslanan daha sabit qlobal iqtisadiyyat yaratmağa çalışır. BRİCS qlobal iqtisadiyyatın 40 faizindən çoxunu təşkil edir. BRICS tərəfdaşları ilə bu rəqəm 45 faizə və ya 93 trilyon dollara çatır. BRİCS dünya əhalisinin demək olar ki, yarısını təşkil edir. Rusiyada BRİCS ölkələrinin payı və ticarət dövriyyəsi durmadan artır və 2024-cü ildə 48 faizin üzərində çıxdı. Ödənişlərin 90 faizi milli valyuta ilə həyata keçirilir”.

Lavrov Beynəlxalq Valyuta Fondu (BVF) və Dünya Bankının müstəmləkəçilik siyasəti üçün istifadə edilməməsi lazım olduğunu vurğulayıb.