Rusiya Ukraynaya qarşı hücumlarda istifadə etmək üçün “UMPB-5” (Unifitsirovannaya Mejvidovaya Planirovaya Bomba) adlı yeni idarəolunan sürüşən bombanı işə salıb. Bu addım Moskvanın hava hücum qabiliyyətlərini artırmaq cəhdlərinin bir hissəsi kimi qiymətləndirilir.

Vaxt.az xəbər verir ki, Ukraynalı rəsmilər bildiriblər ki, Rusiyanın yeni “UMPB-5” idarəolunan hava bombaları son iki ay ərzində “Su-34” qırıcıları tərəfindən Ukraynanın iki fərqli bölgəsinə atılıb.

ABŞ-ın paytaxtı Vaşinqtonda yerləşən “Demokrasiyaların Müdafiəsi Fondu” (Foundation for Defense of Democracies – FDD) tərəfindən “Newsweek” nəşrinə təqdim edilən analizə görə, bu bomba Rusiyanın aşağı maliyyətli və uzaqmənzilli idarəolunan silah sistemləri yaratmaq istiqamətində atdığı yeni addımlardandır.

Müharibədən əvvəl nadir hallarda istehsal edilirdi

Rusiyanın Ukraynaya qarşı genişmiqyaslı hücumundan əvvəl Moskva bu tip idarəolunan sürüşən bombalara nə qədər ehtiyac olacağını düzgün qiymətləndirməmişdi. Müharibədən əvvəl bu bombalar nisbətən baha başa gəldiyi üçün çox az hallarda istifadə olunurdu.

İşğalın ilk mərhələsində Ukrayna hava hücumundan müdafiə sistemlərini sıradan çıxarmaqda uğursuz olan Rusiya, sonrakı mərhələdə uzun məsafədən buraxıla bilən və daha ucuz bombalar hazırlamağa yönəldi. Bu da hava qüvvələrinin döyüşdə daha aktiv iştirakını təmin etdi.

Ukrayna şəhərləri bir neçə dəfə hədəfə alındı

Ukraynalı rəsmilərin sözlərinə görə, “UMPB-5” ilk dəfə Sumı bölgəsində, daha sonra isə Xarkov şəhərinə edilən hava hücumlarında istifadə olunub. Həmin hücumların birində xəstəxana, digərində isə yaşayış obyektləri hədəfə alınıb.

İkinci hadisə zamanı Su-34 qırıcısı bu bombanı Rusiyanın Belqorod vilayətindən – hədəfdən təqribən 105 kilometr məsafədən buraxıb.

Sınaq mərhələsində olan silah əvvəlkindən azı 2 dəfə güclüdür

Hərbi ekspertlər bildirirlər ki, Rusiya bu silahı hələ də sınaqdan keçirir və texniki göstəriciləri tam məlum deyil. “UMPB-5” adından göründüyü kimi, bu bomba 2024-cü ilin yazında ilk dəfə görünən UMPB D-30SN modelinin bir modifikasiyasıdır.

“D-30SN” modelinin 80 kilometri aşan uçuş məsafəsi və təxminən 250 kiloqramlıq döyüş başlığı var. Bu isə yeni “UMPB-5”in əvvəlki versiyadan ən azı 2,5 dəfə daha güclü olduğu ehtimalını yaradır.

Rusiya gündə 160 ədəd istifadə edir

Ukrayna Prezidenti Vladimir Zelenski bu ayın əvvəlində verdiyi açıqlamada bildirib ki, 2025-ci ilin iyulunda Rusiya hər gün orta hesabla 160 ədəd sürüşən bomba atır. Bu rəqəm 2023-cü ilin yazı ilə müqayisədə səkkiz dəfə çoxdur və müharibənin miqyasının artdığını göstərir.