Rusiya Strateji Raket Qoşunlarının komandanı Sergey Karakayev bildirib ki, qitələrarası ballistik “Sarmat” raketi sınaq məqsədilə uğurla buraxılıb.

VAXT.AZ xəbər verir ki, Kremlin yaydığı məlumata görə, Rusiya Prezidenti Vladimir Putin Strateji Raket Qoşunlarının komandanı Sergey Karakayev ilə videobağlantı vasitəsilə görüş keçirib.

Karakayev görüş zamanı Putinə “Sarmat” raketinin uğurla sınaqdan keçirildiyini bildirərək, “Bu gün maye yanacaqlı qitələrarası ballistik ‘Sarmat’ raketi buraxıldı. Sınaq uğurla başa çatdı. Nəticələr raketin düzgün layihələndirildiyini təsdiqlədi”, – deyib.

Onun sözlərinə görə, sözügedən raket kompleksi ilin sonunadək döyüş növbətçiliyinə qəbul ediləcək. Karakayev qeyd edib ki, bu sistem Rusiyanın strateji nüvə qüvvələrinin imkanlarını əhəmiyyətli dərəcədə artıracaq.

Prezident Putin isə “Sarmat” raketinin uğurlu sınağı münasibətilə Karakayevi təbrik edib.

Putin sözlərinə görə, raketin hazırlanmasına 2011-ci ildə başlanılıb: “Bu, dünyanın ən güclü raket sistemidir. Raketin döyüş başlığı Qərb raketlərində istifadə olunan analoqlardan dörd dəfə güclüdür. “Sarmat” yalnız ballistik trayektoriya ilə deyil, həm də suborbital uçuş həyata keçirə bilir. Bu xüsusiyyət raketə 35 min kilometrdən çox uçuş məsafəsi verir, dəqiqliyini iki dəfə artırır və həm mövcud, həm də gələcəkdə yaradılacaq raketdən müdafiə sistemlərini dəf etməyə imkan yaradır”.

“Oreşnik” nüvə başlığı ilə təchiz oluna bilər

Putin bildirib ki, Rusiya 2000-ci illərdən etibarən nüvə çəkindirmə qüvvələrinin gücləndirilməsinə yenidən başlayıb və bu istiqamətdə işlər hazırda da davam etdirilir.

Onun sözlərinə görə, ABŞ-nin 2002-ci ildə “ABM Treaty Withdrawal” çərçivəsində “Anti-Ballistic Missile Treaty”dən çıxmasından sonra Rusiya strateji təhlükəsizliyini təmin etmək və qüvvələr balansını qorumaq üçün yeni silah sistemləri hazırlamağa məcbur olub.

Putin qeyd edib ki, bu proqram çərçivəsində “Avanqard” və “Kinjal” hipersəs raket sistemləri artıq silahlanmaya qəbul edilib. O əlavə edib ki, “Kinjal” raketləri Ukraynadakı hərbi əməliyyatlarda istifadə olunub və onların modernləşdirilməsi üzrə işlər davam edir.

Putinin sözlərinə görə, orta mənzilli hipersəs ballistik “Oreşnik” raketi 2025-ci ildə Rusiya ordusunun arsenalına daxil edilib: “Bu raket də nüvə başlıqları ilə təchiz oluna bilər”.

Rusiya Müdafiə Nazirliyi “Sarmat” raketinin sınağı ilə bağlı videogörüntülər də yayıb.