Şərqi Ukraynada Rusiya yönümlü separatçılar tərəfindən əsir götürülən ATƏT müşahidəçilərindən ibarət son dəstə sərbəst buraxıldı. Onların azadlığının təmin olunması Avropa İttifaqı (Aİ) liderlərinin iyunun 27-də baş tutan görüşlərində müzakirə olunan prioritet məsələ idi. Məlumatı «Reuters» xəbər agentliyi yayıb.

İyunun 28-də Avropada Təhlükəsizlik və Əməkdaşlıq Təşkilatının yaydığı bəyanata əsasən, Ukraynada Xüsusi Monitorinq Missiyası qrupunun əsir götürülmüş 4 nümayəndəsi azad edildilər. Qeyd edək ki, nümayəndə heyəti üzvləri 1 aydan artıq zaman ərzində Luqansk əyalətində üsyançılar tərəfindən əsir saxlanılırdılar.

«Bütün ATƏT ailəsi nümayəndə heyətimizin təhlükəsiz  və çoxdan gözlənilən azadlığını alqışlayır», - deyə ATƏT-in baş katibi Lamberto Zanniyer ATƏT-in rəsmi saytına verdiyi açıqlamalarda bildirmişdir. «Onlar tarixin ən çətin anlarından birində Ukraynadan öz köməklərini əsirgəmədilər. Biz onların bu şücaətinə heyranlıq və bu cəsurluq qarşısında baş əyirik.»

İyunun 27-si Aİ liderlərinin toplaşdığı sammitdə əsas müzakirə mövzusu və tələb Ukraynada olan bütün əsirlərin, eləcə də ATƏT müşahidəçilərinin sərbəst buraxılması idi.

Üsyançıların lideri Aleksandr Boroday «İnterfax» xəbər agentliyinə verdiyi müsahibəsində «Biz Ukrayna tərəfindən öncə üzərimizə düşən  bütün öhdəlikləri yerinə yetirdik. ATƏT-in 8 müşahidəçisi azad olundu», - deyə bildirmişdir.

Atəşkəsin vaxtı uzadıldı

ATƏT-in müşahidəçilərindən ibarət heyətin azadlığı Petro Poroşenkonun Ukrayna ordusu və üsyançılar arasında atəşkəsin vaxtının uzadılması bəyanatından sonra baş verdi. Atəşkəs elan olunsa da, üsyançı qüvvələr yenə də əmrə tabe olmayaraq, Slovyansk şəhəri yaxınlığında 3 Ukrayna ordusu əsgərinin ölümünə səbəb oldular.

«Üsyançıların Slovyansk yaxınlığında Ukrayna ordusunun hərbi məntəqəsinə açdıqları atəş nəticəsində 3 əsgərimiz həlak oldu, 1-i isə yaralandı», - deyə Ukrayna Müdafiə Nazirliyinin sözçüsü Aleksiy Dmitraşkovski «İnterfax»a verdiyi müsahibəsində bildirmişdir.

«Yaralanan və həlak olan əsgərlərimiz Ukrayna ordusunun «anti-terrorist əməliyyatları» qrupunun üzvləri idi və Slovyansk şəhərində təhlükəsizliyinin təmin olunması öhdəliyini daşıyırdılar», - deyə Dmitraşkovski öz müsahibəsinə əlavə etmişdir.

Aİ təzyiqi artırır

Ukraynada hərbiçilər və üsyançı qüvvələr arasında bir həftə davam edən atəşkəs 72 saat müddətinə əlavə olaraq uzadıldı. Poroşenko Rusiyanın etirazlarına baxmayaraq, Aİ və Ukraynada arasında olan azad ticarət və siyasi assosiasiya müqaviləsinə imza atdıqdan sonra vətənə dönərək atəşkəsin vaxtının artırılması haqda bəyanat verdi.

Aİ liderlərinin iyunun 27-si baş tutan görüşündə üsyançı qüvvələrin və Ukrayna tərəfinin sülh planı ilə bağlı müzakirə masasına əyləşmələri vacib tələblərdən biri olaraq səsləndirildi.

Qeyd edək ki, 15 müddəadan ibarət sülh planı üsyançılar tərəfindən qəbul olunmamışdı.

Donetsk vilayətində olan separatçıların lideri Miroslav Rudenko iddia edir ki, atəşkəsi Ukrayna dövləti öz maraqlarına xidmət üçün elan edib. Belə ki, onun fikrincə, atəşkəs müddətində hökumət öz hərbi qüvvələrini üsyançıların yerləşdiyi ərazilərdə möhkəmləndirmək istəyir.