Ukrayna prezidenti Petro Poroşenko Ukraynadakı münaqişə ilə bağlı danışıqlar üçün yeni məkan təklif edib. Lakin hələ ki, Poroşenko qarşı tərəfdən cavab gözlədiyini qeyd edib. Məlumatı «Reuters» xəbər agentliyi yayıb.

İyulun 4-ü Ukrayna prezident administrasiyasının verdiyi məlumata görə, Poroşenko separatistlər və Rusiya tərəfi ilə müzakirələr aparmaq məqsədi ilə birgə keçirilə biləcək görüşün mümkünlüyü haqda Aİ-nın xarici siyasət üzrə ali nümayəndəsi Ketrin Eştona (Catherine Ashton) məlumat verib. Ukraynanın sabiq prezidenti, Rusiyanın Kiyevdəki fövqəladə və səlahiyyətli səfiri, həmçinin Avropada Təhlükəsizlik və Əməkdaşlıq Təşkilatının (ATƏT) nümayəndələri münaqişənin yekun həll yolunun tapılması üçün vasitəçilik etməyə hazır olduqlarını bildirmişlər.

«Ukrayna ikitərəfli görüş üçün yer və vaxt təklif edib, hal-hazırda qarşı tərəfin cavabını gözləyirik», - deyə Ukrayna prezident administrasiyası nümayəndələri bildirmişlər.

Separatçıların Poroşenkonun sərhəd məntəqəsinin təhvili ilə bağlı tələbinə imtinasından sonra, ölkə ərazisində elan olunan atəşkəs ləğv edildi. Lakin buna baxmayaraq, alman kansleri Angela Merkel, Fransız prezidenti Fransua Olland və Rusiya prezidenti Vladimir Putin Poroşenkoya atəşkəsin davam etdirilməsinin vacibliyini vurğulamışlar.

Terroristlərin zərərləşdirilməsi

Ukraynanın Milli Təhlükəsizlik və Müdafiə Şurasının katibi Andriy Parubiy mətbuata verdiyi açıqlamalarda Ukrayna tərəfinin artıq «B» planına keçid edərək, separatçı qüvvələrin mövqelərini ağır silah və artilleriyadan atəşə tutduqlarını bildirib. Onun sözlərinə əsasən, birtərəfli atəşkəs bitdikdən sonra, Ukrayna tərəfi 17 kəndi öz nəzarəti altına almışdır. Ümumilikdə Luqansk və Donetsk vilayətlərində 36 məntəqədən 23-ü Ukrayna tərəfinin nəzarəti altındadır.

«Luqansk və Donetsk bölgələrində terroristlərin zərərləşdirilməsi prosesi hələ də davam edir. Üsyançı qüvvələrin bu qədər müddət ərzində təslim olmamalarının səbəbi isə Rusiya tərəfinin onları mütəmadi silah-sursat və hərbi texnika ilə təmin etməsidir», - Parubiy mətbuat konfransında bildirmişdir.

Parubiy əlavə olaraq qeyd etmişdir ki, Rusiyayönümlü separatçılar həm Rusiya tərəfindən, həm də ölkənin daxili ərazilərindən gələrək üsyançıların ordusuna qoşulurlar.

Ukrayna tərəfi israrla Rusiyanın üsyançılara yardım etdiyini vurğulasa da, rəsmi Moskva bu ittihamları qəbul etməkdən boyun qaçırır. Lakin bu danılmaz faktdır ki, Rusiya Krım yarımadasını mart ayında işğal edib və bu proses Ukrayna tərəfini öz sərhədlərinin təhlükəsizliyi ilə bağlı narahatlıqların yaranmasına səbəb olur. Bəzi separatçılar və millətçilər Krımın rəsmən Rusiyaya birləşdirilməsi üçün Putindən əraziyə qoşun yeritməsini xahiş ediblər, ancaq Qərbin tətbiq etdiyi sanksiyalardan ehtiyatlanan Rusiya prezidenti bu addımı atmaqdan boyun qaçırıb.

Atəşkəs bitdikdən sonra davam edən döyüşlər nəticəsində onlarla Ukrayna ordusu əsgərinin öldürüldüyü bildirilir. Ukraynanın terrorizmə qarşı mübarizə komitəsinin sözçüsünün verdiyi məlumatlara əsasən, ordu artıq separatistlərin 6 mövqeyini və Nikolayevka şəhərini mühasirəyə almışdır. Davam edən döyüşlər nəticəsində 4 əsgərin yaralandığı qeyd edilir.