Rusiya ilə Belarus arasındakı regional təhlükəsizlik sazişinə dəyişiklik edilməsi ilə bağlı protokol imzalanıb. Rusiya Müdafiə Nazirliyindən müdafiə naziri Sergey Şoyqu ilə Belaruslu həmkarı Viktor Xrenin arasında imzalanan düzəlişlə bağlı verilən açıqlamada deyilir ki, dekabr 3-də Minskdə Rusiyanın müdafiə naziri Sergey Şoyqu və Viktor Xrenin hərbi sahədə regional təhlükəsizliyi birgə təmin etmək barədə razılığa gəliblər: “Beləliklə beynəlxalq müqaviləyə dəyişiklik edilməsi haqqında saziş imzalanıb”, – deyə məlumatda bildirilir.

Bəyanatda Sergey Şoyqunun dəyişikliklə bağlı fikirləri də yer alıb: “Belarusla müttəfiqlik münasibətləri Qərbin görünməmiş təzyiqi və ittifaq dövlətlərinə elan edilən müharibə qarşısında əhəmiyyət qazanıb. Belarus bizim etibarlı tərəfdaşımızdır və olmaqda davam edir”. Bildirilib ki, Şoyqu Minskin ABŞ və müttəfiqlərinin Belarusa, eləcə də Rusiyaya qarşı təzyiqlərindəki mövqeyini yüksək qiymətləndirib.

Şoyqu həmçinin bildirib ki, regional təhlükəsizlik qrupunun əsgərləri Belarus ərazisində döyüş koordinasiyası fəaliyyətləri həyata keçirir: “Hazırda iki ölkənin dövlət başçılarının qərarına əsasən, Rusiya və Belarus ortaq regional güc hərbi birləşmələri döyüş təlimləri həyata keçirir”.