vaxtlı-vaxtında oxuyun! Çərşənbə axşamı, 31 yanvar 2023
1 ABŞ dolları 1 USD = 1.7 AZN
1 Avro 1 EUR = 1.6977 AZN
1 Rusiya rublu 1 RUB = 0.0272 AZN
1 İngiltərə funt sterlinqi 1 GBP = 1.9671 AZN
1 Türkiyə lirəsi 1 TRY = 0.0914 AZN
Babək Xürrəmi (798 - 838)

«Əgər qılınc pas atıbsa, deməli sahibi ölübdür»

Babək Xürrəmi (798 - 838)
REPORTYOR  
09:47 | 29 dekabr 2022 | Cümə axşamı Məqaləyə 3069 dəfə baxılıb Şriftin ölçüsü Xəbərin şriftini kiçilt Xəbərin şriftini böyüt

“Soyuq əllər, isti ürək”

Ənənəvi xeyriyyə yarmarkasında maraqlı yeniliklər də var

NURƏDDİN

2023-cü ilə sayılı günlər qalır. Paytaxtımızda, digər şəhər-rayonlarda Yeni ilin gəlişi ilə bağlı müxtəlif bayram tədbirləri təşkil olunur. Bakıda metronun bir sıra stansiyalarının çıxışlarında yarmarka çadırları qurulub. Şəhərin bir çox məkanlarında böyük yolkalar bəzədilib.

Yeni illə bağlı tədbirlərdən biri də artıq doqquzuncu dəfə təşkil olunan “Soyuq əllər, isti ürək” xeyriyyə yarmarkasıdır. Fəvvarələr meydanında dekabrın 1-də açılmış yarmarka “Nargis” Fondunun təşəbbüsü ilə keçirilir.

Yarmarkada jonqlyorlar, müxtəlif nağıl qəhrəmanları, sevilən cizgi film personajları, animatorlar, musiqiçilər uşaqdan böyüyədək hər kəsi sevindirir.

Ənənəvi yarmarkanın sponsor dəstəyi və ərazidə qurulan “ev”lərin kirayəsindən toplanan vəsait müxtəlif xəstəliklərdən əziyyət çəkən uşaqların müalicəsinə sərf edilir. Bu ildən etibarən yarmarkada hər bir “ev”in üzərində quraşdırılmış xüsusi QR kodu skan edərək ötən illərdə bu layihənin dəstəyi ilə əməliyyat olunmuş uşaqların hekayələri ilə tanış olmaq da mümkündür.

Builki xeyriyyə yarmarkası bir sıra yeniliklər ilə fərqlənir. Yarmarka 64 böyük və 20 balaca “ev”, 3 ikimərtəbəli restoran, müxtəlif köşklər və tematik zonalardan ibarətdir. Yarmarkanın qonaqları suvenirlər, hədiyyələr əldə edə, müxtəlif yeməklərdən dada  bilərlər. Burada müxtəlif oyunlar oynamaq, Şaxta baba və Qar qızla şəkillər çəkdirmək, bir sözlə, əsl Yeni il ab-havası yaşamaq üçün hər cür şərait yaradılıb.

Yarmarkada öz əl işlərini satan şəxslər də var. Toxuma işi ilə məşğul olan Əfsanə Əliyeva deyir: “Gördüyünüz əl işləri qadın geyimləridir. Bunların modellərini özüm hazırlayıb, toxuyuram. Əl işlərimi sosial şəbəkə səhifələrim vasitəsilə də satışa çıxarıram”.

Bu il yarmarka ərazisində ilk dəfə olaraq “qorxu otağı” və 4D kinoteatr da fəaliyyət göstərir. Qonaqlar yarmarkanın müxtəlif yerlərində “nadinc elflərə” də rast gələ bilərlər. Bu layihə 2005-ci ildə amerikalı yazıçı Carol Aebersold və qızı Chanda Bell tərəfindən yazılmış və qısa müddətdə dünyada şöhrət qazanmış “Rəfdəki Elf: bir Milad ənənəsi” kitabından ilham alınaraq hazırlanıb.

“Soyuq əllər, isti ürək” xeyriyyə yarmarkası yanvarın 15-dək fəaliyyət göstərəcək.