Yerusəlimdə, Məbəd dağı yaxınlığında atışma baş verib. Üç nəfərin polis əməkdaşlarına atəş açaraq üç nəfəri yaraladıqları bildirilib. Atəş açanlar bundan sonra öldürülüb.

Polisin məlumatına əsasən, hücum edənlər Qədim şəhərin Şir darvazası qarşısında qəflətən atəş açmağa başlayaraq Məbəd dağında gizlənməyə çalışıblar.

Ancaq polis onların yerini aşkar etdikdən sonra atışma gedişində hücumçuların üçü də öldürülmüşdü.

Yerli medianın məlumatına əsasən, ölənlərin üstündə odlu silah və bıçaqlar tapılıb.

Hücumçuların kimliyi barədə məlumat açıqlanmır.

Yaralananlar xəstəxanaya yerləşdirilib.

Onlardan ikisinin vəziyyətinin kritik olduğu bildirilir.

Hazırda baş vermiş hadisə ilə bağlı Məbəd dağına giriş bağlanıb, ziyarətçilər ərazidən evakuasiya olunub.

Məbəd dağı - yəhudilər və müsəlmanlar üçün müqəddəs bir yer sayılır.

Məbəd dağı Şərqi Yerusəlimdə (Şərqi Qüdsdə) yerləşir.

Fələstinlilər Şərqi Yerusəlimdə öz gələcək dövlətlərinin paytaxtı sayır, İsrail isə təkid edir ki, şəhər bütünlükdə İsrail dövlətinin vahid və bölünməz paytaxtıdır.