Tayvan Müdafiə Nazirliyi, Çinin adanın sahillərində canlı atəş təlimi keçirdiyini elan etməsindən sonra bu gün bölgəyə qoşun yeritdiyini açıqlayıb. Nazirlik təlimləri təhlükəli adlandırıb.

Nazirlik bildirib ki, Çin Tayvan ətrafında 32 təyyarə yerləşdirdiyini və adanın cənubundakı 40 dəniz mili (74 kilometr) yaxınlığındakı ərazidə təlim keçirdiyini açıqlayandan sonra Taypey lazımi cavab vermək üçün bölgəyə dəniz, hava və quru qüvvələrini göndərib.

Nazirlik qeyd edib ki, Çin hərbçiləri “birtərəfli qaydada Kaohsiunq və Pinqtunq sahillərində 40 dəniz millik təlim zonası təyin edərək, əvvəlcədən xəbərdarlıq etmədən canlı atəşli təlimlər keçirməklə beynəlxalq normaları açıq şəkildə pozub”.

Bəyanatın davamında deyilir: “Bu hərəkət beynəlxalq uçuşların və dənizdəki gəmilərin təhlükəsizliyi üçün ciddi risk yaradır. Bu, həm də regional təhlükəsizlik və sabitliyi hədəf alan açıq-aşkar təxribatdır”.

Çin, Taypeyin rədd etdiyi suverenlik iddialarının bir hissəsi olaraq adaya təzyiq göstərmək cəhdi ilə son illərdə Tayvan ətrafında döyüş təyyarələri və döyüş gəmiləri yerləşdirməsini gücləndirib.