ABŞ Prezidenti Donald Tramp bildirib ki, Çin “Boeing” şirkətindən 200 sərnişin təyyarəsi almağa razılıq verib.

VAXT.AZ xəbər verir  ki, Tramp bu açıqlamanı dünən “Fox News” telekanalına verdiyi müsahibədə səsləndirib.

Milyardlarla dollar dəyərində qiymətləndirilən bu razılaşma Çinin son təxminən on ildə ilk dəfə ABŞ istehsalı olan kommersiya təyyarələri sifariş etməsi deməkdir.

“Boeing” üçün bu müqavilə Çin aviaşirkətləri ilə illərdir davam edən danışıqların nəticə verməsi və dünyanın ikinci ən böyük aviasiya bazarında uzun müddətdir davam edən sifariş durğunluğunun başa çatması baxımından mühüm əhəmiyyət daşıyır.

Çinə satışların bərpası şirkətin baş icraçı direktoru Kelli Ortberqin rəhbərliyi ilə həyata keçirilən korporativ transformasiya prosesində maliyyə vəziyyətinin möhkəmlənməsinə dəstək verəcək.

Razılaşma həmçinin yeni sərnişin təyyarələrinə qlobal tələbin istehsalçıların mövcud imkanlarını üstələdiyi bir dövrdə Çin aviaşirkətlərinin ABŞ istehsalı olan təyyarələrə çıxışını təmin edəcək.