İran Quru Qoşunlarının komandanı, briqada generalı Kiyomers Heydəri bildirib ki, ilin sonuna qədər ölkənin Əfqanıstan və Pakistanın daxil olduğu şərq sərhədində 400 kilometrlik təhlükəsizlik divarı tikiləcək.

İran dövlət televiziyasına danışan Heydəri “indiyədək 103 kilometr divar çəkmişik və 140 kilometr divar üçün infrastrukturu hazırlamışıq. İlin sonuna qədər sərhədlərin bağlanması işlərini 400 kilometrə çatdıracağıq”, – deyib.

İran rəsmisi qeyd edib ki, divar smart sensorlar və yüksək texnologiyalı monitorinq sistemləri ilə təchiz olunacaq.

Tehran administrasiyası Əfqanıstan və Pakistan sərhədində inşa etdiyi 4 metr hündürlüyündə beton divarla qeyri-qanuni immiqrasiya və rejim əleyhinə olanların ölkəyə sızmasının qarşısını almağı hədəfləyir.