Rusiya prezidenti Vladimir Putin paytaxt Moskvada müxtəlif sektorlardan şirkətlərin nümayəndələri ilə görüşərək iqtisadiyyatla bağlı qiymətləndirmələr aparıb.

Rusiya iqtisadiyyatının alıcılıq pariteti baxımından dünyada dördüncü sıraya yüksəldiyinə diqqət çəkən Putin, “Rusiya iqtisadiyyatı çətin şərtlərdə 2023-cü ildə yüzdə 4,1, keçən il isə yüzdə 4,3 olmaqla üstün bir sürətlə böyüyüb. Bu yaxşı göstəricidir”, – deyib.

Putin həmçinin qeyd edib ki, sözügedən artım məhdud sektorlara deyil, sənaye, kənd təsərrüfatı, rəqəmsal texnologiyalar, xidmətlər və maliyyə kimi müxtəlif sahələrə yayılıb.

Rusiya iş dünyasının son illərdə beynəlxalq ödənişlər, logistika və tədarük zənciri sahələrində çətinliklərlə üzləşdiyini açıqlayan Putin, “Bir çox Qərb şirkəti siyasi təzyiqlər səbəbilə Rusiya bazarından çəkilərkən, bəzi şirkətlər rus ortaqlarını çətin vəziyyətdə qoyub”, – deyib.

Putin çıxışında ABŞ şirkətlərinin Rusiyaya tibbi avadanlıq tədarükünü və xidmətlərini davam etdirdiyinə, Avropa şirkətlərinin isə bunu etmədiyinə də diqqət çəkib.

Yerli istehsal əvəzinə xaricdən gətirilən məhsulların istifadəsinə zəmin yaradan bütün “boşluqların” bağlanması lazım olduğunu vurğulayan Putin, “Əks halda yerli məhsulumuz qalmayacaq”, – dedi.

***

İclasda çıxış edən bir iş adamının Rusiyada “Microsoft” və “Zoom” kimi xidmətlərin qazanc əldə etməyə davam etdiyi ilə bağlı şərhinə münasibət bildirən Putin, “Onları nəfəslərini kəsmək lazımdır. Tamamilə razıyam. Bunu tərəddüd etmədən deyirəm, çünki onlar da bizi boğmağa çalışırlar, cavab verməliyik”.

Putin həmçinin vurğulayıb ki, rus istifadəçiləri “pis vərdişləri” ehtiva edən Qərb xidmətlərindən qurtulmalıdırlar.

Ukrayna müharibəsinin başlaması ilə “McDonalds”ın Rusiya bazarını tərk etməsindən danışan Putin, “Hamını çətin vəziyyətə saldılar, getdilər, indi geri qayıtmaq istəsələr, onlara yol verməyəcəyik”, – deyib.