Dünən səhər saatlarında İsrailin İrana hava zərbələri endirdikdən sonra İran axşam saatlarında cavab zərbələri endirib. İsrail Müdafiə Qüvvələrinin (IDF) bəyanatında deyilir ki, Tehran İsrailə “onlarla raket” atıb. Paytaxt Tel-Əvivdə tüstü yüksələrkən, həm Tel-Əvivdə, həm də Yerusəlimdə partlayış səsləri eşidilib.

İran dövlət mediası Tehranın cavab olaraq İsrailə yüzlərlə müxtəlif ballistik raket atdığını bildirib. İranın rəsmi xəbər agentliyi İRNA bildirib ki, “Sionist rejimin vəhşi hücumuna qəti cavab əməliyyatı bir neçə dəqiqə əvvəl işğal olunmuş ərazilərə yüzlərlə müxtəlif ballistik raketlərin atılması ilə başlayıb”.

***

İran İnqilabı Keşikçiləri Korpusundan (SEPAH) verilən açıqlamada İsrailə məxsus “onlarca hədəf, hərbi mərkəz və hava bazası”na hücum edildiyi bildirilib.

Əməliyyatın “Real Word 3” adlandığı və ətraflı məlumatın daha sonra paylaşılacağı bildirilib.

İRNA həmçinin İran hava məkanında ən azı iki İsrail döyüş təyyarəsinin vurulduğunu bildirib.

İran dövlət televiziyası Press TV də cümə günü axşam saatlarında İsrailin raketlərinin İranın şimal-qərbindəki Təbriz şəhəri üzərində vurulduğunu iddia edib.

***

CNN-ə danışan İsrail polisi sözçüsünə görə, İranın hərbi sursatları Tel-Əvivdə yaşayış massivinə düşüb, lakin hələlik xəsarət alan olmayıb.

“Bu yaxınlarda İsrail polisi Tel-Əviv rayonundakı icmalardan birinə döyüş sursatı düşməsi barədə məlumat alıb. Əmlak ziyanı olub”, – sözçü bildirib.

“Polis əməkdaşları və bomba zərərsizləşdirilməsi üzrə mütəxəssislər hazırda zərbə nöqtələrini təcrid etmək üçün çalışırlar”.

İsrailin fövqəladə hallar xidmətinin rəhbəri Eli Bin Tel-Əviv və Ramat Qan şəhəri sərhədində baş verən hücumda yeddi nəfərin "yüngül və orta dərəcədə yaralandığını" açıqlayıb.

***

İsrailin müdafiə naziri İsrael Katz deyib ki, İran mülki mərkəzləri raketlərlə vurmaqla sərhədi keçib və bunun çox ağır qiymət olacaq.

İsrail rəsmisi CNN-ə deyib: “İran əhali mərkəzlərinə atəş açdığı üçün ağır bədəl ödəyəcək”.

Bu arada ABŞ-da “Dow Jones” indeksi İranın əks hücumundan sonra 868 bənd (2 faiz) geriləyib.

***

İsrail cümə günü səhər saatlarında İranın paytaxtı Tehranı hədəfə alıb. Partlayışlar bütün şəhərdə əks-səda verib. İsrail hücumda nüvə və hərbi obyektlərin vurulduğunu açıqlayıb.

İsrailin baş naziri Benyamin Netanyahu əməliyyatın “Yüksələn Aslan əməliyyatı” adlandırılacağını açıqlayıb. Hücumda 200-ə yaxın İsrail təyyarəsi iştirak edib və 100-ə yaxın hədəf vurulub.

Hücumlarda nüvə proqramı ilə əlaqəli yüksək səviyyəli komandirlər və elm adamları öldürüldü.

Hücum İranın nüvə proqramında sürətlə irəliləməsi səbəbindən gərginliyin pik həddə çatdığı bir vaxta təsadüf edir. Cümə axşamı Beynəlxalq Atom Enerjisi Agentliyinin (MAQATE) Rəhbərlər Şurası İranı son 20 ildə ilk dəfə müfəttişlərlə əməkdaşlıq etmədiyinə görə rəsmi şəkildə qınayıb.

Hücumun ilk saatlarında ABŞ dövlət katibi Marko Rubio İsrailin İrana hücumlarında ABŞ-ın heç bir rolunun olmadığını deyib və Tehrana ABŞ-ın maraqlarını və şəxsi heyətini hədəf almamaq barədə xəbərdarlıq edib.

Bununla belə, ABŞ prezidenti Donald Tramp deyib ki, İran razılaşma əldə etməlidir, əks halda gələcək hücumlar “daha ​​qəddar” olacaq.