İsrailin baş naziri Benyamin Netanyahu iyunun 13-də İrana qarşı başlanan irimiqyaslı hücumlardan sonra ilk dəfə kameralar qarşısında açıqlamalar verib.

Mətbuat konfransında çıxış edən Netanyahu, İranın dini lideri Ayətullah Əli Xameneiyə qarşı mümkün sui-qəsdin qapısını açıq qoyaraq, “Planlarımızı ictimaiyyətlə paylaşmayacağam, amma nə lazımdırsa edəcəyik”, – deyib.

İsrailin İran üzərində hava üstünlüyünü vurğulayan Netanyahu, “Biz Tehranın səmasına nəzarət edirik. Tehrana hava yolu çəkmişik”, – dedi. O, bildirib ki, İran paytaxtı tez-tez döyüş təyyarələri tərəfindən bombalanır.

İranın hava hücumundan müdafiə sistemlərinin zərərsizləşdirildiyini iddia edən Netanyahu, bir çox pilotsuz uçuş aparatının və mühüm radar sisteminin İsrail tərəfindən məhv edildiyini açıqlayıb.

***

İsrail ordusunun hücumlarının hərbi qərargahları, ballistik raket istehsal müəssisələrini və raket qurğularını, eləcə də İran Radio və Televiziya Korporasiyası (IRİB) kimi mülki infrastrukturu hədəf aldığını qeyd edən Netanyahu, indiyədək 10 iranlı nüvə aliminin öldürüldüyünü və hədəf siyahılarında daha bir neçə şəxsin olduğunu bildirib.

“Nüvə hədəflərini sistematik şəkildə məhv edirik”, – deyən Netanyahu, Natanz Nüvə Obyektinə də ağır hücum həyata keçirdiklərini bildirdi.

***

Netanyahu ABŞ prezidenti Donald Trampla daimi təmasda olduqlarını bildirib və verdiyi dəstəyə görə Vaşinqtona təşəkkür edib.

İsrailin 13 iyunda başlatdığı hücumlarda İranda bir çox nüvə obyekti və hərbi obyektlər bombalanıb. Bu hücumlarda İranın Baş Qərargah rəisi, SEPAH Baş Komandanı, çoxlu yüksək səviyyəli rəsmilər və 10 nüvə alimi həyatını itirib. İran mənbələri mülki vətəndaşların sayının 224 olduğunu açıqlayıb.

İranın İsrailə qarşı ballistik raket zərbələri nəticəsində 24 nəfər həlak olub, 500-dən çox insan yaralanıb.