ABŞ-ın İrana qarşı hərbi əməliyyata qoşulacağı barədə məlumatlar yayılır.

Bu məlumatlar inandırıcı görünür, çünki “İran problemi”in həlli üçün çoxdan axtarılan fürsət əldə edilib. İsrail İranın hərbsizləşdirilməsi və nüvəsizləşdirilməsinə nail olmadan dayanmaq niyyətində deyil. Lakin İran strateji dərinliyi olan, ərazicə böyük dövlətdir, hərbi obyektləri dislokativ baxımdan əks-mərkəzləşdirilib. Bu səbəblərdən İsrail ABŞ-ın aktiv dəstəyi olmadan qarşısına qoyduğu məqsədlərə qısa müddətdə nail ola bilməz, uzanan müharibəyə isə hərbi potensialı yetməz.

Xüsusən Qum yaxınlığında, yerin altında yerləşən Fordo nüvə zənginləşdirmə mərkəzini sıradan çıxarmaq üçün ABŞ-ın strateji bombardmançılarına və bunker dələn bombalarına ehtiyac var.

Unutmaq olmaz ki, Tramp ilk prezidentliyi dövründə nüvə razılaşmasından çıxmaqla bugünkü vəziyyətə zəmin hazırlamış adamdır. Obamanın müəlliflik etdiyi anlaşma İranın nüvə proqramına son qoymurdu, raket proqramını isə ümumiyyətlə əhatə etmirdi. Bu səbəbdən İsrail dövlətinin, İsrail lobbilərinin və respublikaçılar daxilindəki xristian-yəhudi çevrələrin basqısı ilə Tramp o sazişdən birtərəfli qaydada çıxaraq hərbi varianta yol açmış oldu.