ABŞ Ordusunun tezliklə İrana qarşı müharibəyə qoşulacağı bildirilir. Tramp müharibənin birinci fazasında, İsrailin İranı yetərincə zəiflətdiyinə inanır və ikinci fazada birbaşa “sükan arxasına” keçmək istəyir. İddialara görə, Pentaqon da müharibəyə qoşulmağı dəstəkləyir. Bu da onu göstərir ki, ABŞ rəhbərliyi İranın cavab addımlarının effektiv olmayacağı qənaətindədir.

Güman etmək olar ki, ikinci faza üçün ABŞ-ın üç başlıca məqsədi var: İranın nüvə proqramının məhv edilməsi; münasib rejim dəyişikliyinin təmin edilməsi və mərkəzi hakimiyyətin zəiflədildiyi yeni sistemin qurulması. Bu xüsusda, İranın şimal qərbində kürd muxtariyyətinin yaradılması da sürpriz olmayacaq. Bir sözlə, demək olar ki, ABŞ İrandakı proseslərin gedişatını nəzarətinə almağa hazırlaşır.  

İranın nüvə proqramı ilə bağlı ilkin olaraq nüvə strukturunun bombardımanla dağıdılması planlaşdırılır. Mənim üçün ən maraqlı məqam, İranın əlindəki 400 kq-lıq 60% zənginləşdirilmiş uran ehtiyatlarının aqibətidir. Nüvə silahının əsas komponenti olan bu strateji resurs yəqin ki, İran hakimiyyətinin son dayaq nöqtəsidir. Əslində İran hakimiyyəti zənginləşdirilmiş uranı təhvil verməklə müharibəni indi də dayandıra bilər. Bəlkə də Trampın son çıxışlarının və ABŞ-ın hərbi aktivliyini artırmasının məqsədi İran rəhbərliyini məhz, bu yola məcbur etməkdir. Amma bu addım İran dövləti üçün tam təslimçilik deməkdir. Bu ssenaridə belə, İran hakimiyyətini fərqli sonluq gözləmir. Aydındır ki, sona qədər döyüşməyin də İran dövləti üçün daha dağıdıcı nəticələri olacaq.

Bəs, İran rəhbərliyi əlindəki strateji resursu qorumaq üçün sona qədər döyüşməyi seçsə? Bu ssenaridə İrandakı zənginləşdirilmiş uranın ələ keçirilməsi üçün ABŞ və İsrailin xüsusi quru əməliyyatına ehtiyacı ola bilər. Yəqin ki, ABŞ rəhbərliyi təkcə hava qüvvələrini deyil, quru qoşunlarını da müharibəyə hazırlayıb. İrana quru əməliyyat isə ABŞ üçün növbəti bataqlığa çevrilə bilər. Yəni, hadisələr göründüyündən daha mürəkkəbdir. Olduqca effektiv və sarsıdıcı olan ilk fazadan fərqli olaraq, İrana qarşı hərbi kampaniyanı istənilən sonluqla yekunlaşdırmaq çox çətin olacaq.