ABŞ-ın İrana birbaşa hücum edib-etməyəcəyi müzakirə mövzusu olsa da, “The Wall Street Journal” Trampın planı təsdiqlədiyini, lakin “zərbə əmri” vermədiyini yazıb.

“The Wall Street Journal”ın danışıqlardan xəbəri olan mənbələrə əsaslanan hesabatına görə, Tramp ABŞ-ın İrana hücum planlarına yaşıl işıq yandırıb.

Sözügedən mənbələr dünən axşam saatlarında keçirilən görüşdə Trampın ABŞ-ın İrana hücum planlarını gizli şəkildə təsdiqlədiyini, lakin Tehranın nüvə proqramından imtina edib-etməyəcəyinə dair yekun əmri gecikdirdiyini bildirib.

Qeyd olunub ki, İranın yeraltı uranın zənginləşdirilməsi üzrə Fordo obyekti ABŞ-ın mümkün ilk hədəflərindən biri olacaq.

***

İyunun 17-nə keçən gecə Tramp Ağ Evdə İsrailin İrana hücumları ilə başlayan münaqişələr və ABŞ-ın mümkün müdaxiləsi ilə bağlı yüksək səviyyəli rəsmilərlə görüş keçirib.

Dünən jurnalistlərə verdiyi açıqlamada Yaxın Şərqdə münaqişəyə qarışmaq istəmədiyini deyən Tramp, “Nə edəcəyimlə bağlı fikirlərim var, lakin hələ son qərarımı verməmişəm. Müharibədə hər şey dəyişdiyi üçün son qərarımı son saniyəyə qədər vermək istəyirəm”, – deyib.

***

ABŞ-ın yüksək rütbəli rəsmilərinin İrana qarşı mümkün hücuma hazırlaşdığı iddia edilib. İddialara görə, həftə sonu hücuma keçmək planı var.

ABŞ prezidenti Donald Trampın İrana qarşı İsraillə müharibəyə yaşıl işıq yandırdığı, lakin hələlik son təsdiqini vermədiyi iddiaları mətbuatda əksini tapsa da, ABŞ rəsmilərinin də İrana qarşı mümkün hücuma hazırlaşdığı iddia edilib.

“Bloomberg”in məlumatına görə, məsələ ilə tanış olan şəxslər ABŞ-ın yüksək rütbəli rəsmilərinin yaxın günlərdə İrana hücum ehtimalına hazırlaşdıqlarını bildiriblər. “Bloomberg” yazır ki, bu həm də Vaşinqton administrasiyasının Tehranla birbaşa münaqişə üçün zəmin hazırlamasına işarədir.

***

Adının açıqlanmasını istəməyən mənbələr vəziyyətin hələ də inkişaf etdiyini və dəyişə biləcəyini bildiriblər. “Bloomberg”ə danışan bəzi insanlar həftə sonu hücuma başlamaq üçün mümkün planlara işarə ediblər. Mənbələrdən biri bildirib ki, bir qrup federal qurumun yüksək səviyyəli rəhbərləri artıq hücuma hazırlaşmağa başlayıblar.

Tramp ABŞ-ın müharibə edib-etməyəcəyi ilə bağlı qarışıq mesajlar verməyə davam edərkən, “Bloomberg”in istinad etdiyi adı açıqlanmayan Ağ Ev rəsmisi “bütün seçimlərin masada olduğunu” söylədi.

***

Trampın İrana qarşı ritorikası və mümkün hücumu günlər ərzində dəyişsə də, Cənubi Karolina senatoru Lindsi Qraham Trampı “hərbi hərəkət”i nəzərdən keçirməyə çağıranların başındadır. Danışıqlarla tanış olan insanlar Trampın Qrahamla bir neçə dəfə görüşdüyünü bildiriblər.

Qraham dünən İran və nüvə müzakirələrinə toxunaraq, “Biz onlara diplomatiya şansı verdik. Düşünürəm ki, onlar səhv hesablayıblar. Bəşəriyyət üçün bu təhlükəni nə qədər tez aradan qaldırsaq, bir o qədər yaxşıdır”, – deyib.

Tramp həmçinin dəfələrlə, o cümlədən son seçki kampaniyası zamanı deyib ki, ABŞ başqa ölkələrdəki müharibələrdən kənarda qalmalıdır.