ABŞ prezidenti Donald Tramp çərşənbə axşamı səhər saatlarında İran-İsrail arasında 13 iyundan bəri davam edən gərginliyin “atəşkəs”lə sona çatdığını açıqlayıb.

O, sahibi olduğu “Truth Social”da yayımladığı yazılı açıqlamada, “İsrail və İran tam və hərtərəfli atəşkəs mövzusunda tam razılığa gəliblər”, – deyə qeyd edib.

Tramp bəyan edib ki, bu razılaşma son vəzifələr tamamlandıqdan sonra altı saat ərzində qüvvəyə minəcək.

ABŞ prezidenti bu atəşkəsin “12 saat davam edəcəyini bildirib və əlavə edib ki, bu müddətin sonunda müharibə bitmiş hesab olunacaq.

Hər iki ölkəni müharibəni sona çatdırmaqda göstərdikləri dözüm, cəsarətə görə təbrik edən Tramp, “24-cü saatın sonunda 12 günlük müharibənin sona çatması rəsmi olaraq dünyaya elan olunacaq. Atəşkəs zamanı hər iki tərəf qarşı tərəfə sülh və hörmətli münasibət nümayiş etdirəcək”, – deyib.

Sözügedən müharibənin illərlə davam edə biləcəyini və bütün Yaxın Şərqi məhv etmək potensialına malik ola biləcəyini qeyd edən Tramp yekun bölmədə “Allah İsrail, İran və ABŞ-ı qorusun” qeyd edib.

***

İsrail iyunun 13-də İranın paytaxtı Tehranı hədəfə aldı. Partlayışlar şəhərin bir çox yerində səsləndi. İsrail hücumda nüvə və hərbi obyektlərin vurulduğunu açıqladı.

İsrailin baş naziri Benyamin Netanyahu əməliyyatın adının “Yüksəyən Aslan” olduğunu açıqladı. Hücumda 200-ə yaxın İsrail təyyarəsi iştirak edib və 100-ə yaxın hədəfi vurdu.

Hücumlarda nüvə proqramı ilə əlaqəli yüksək səviyyəli komandirlər və elm adamları öldürüldü.

Hücumlar İranın nüvə proqramında sürətli irəliləyişi ilə bağlı gərginliyin pik həddə çatdığı bir vaxta təsadüf edir. Hücumdan bir gün qabaq Beynəlxalq Atom Enerjisi Agentliyinin (MAQATE) Rəhbərlər Şurası İranı son 20 ildə ilk dəfə müfəttişlərlə əməkdaşlıq etmədiyinə görə rəsmi şəkildə qınadı.

Hücumun ilk saatlarında ABŞ dövlət katibi Marko Rubio İsrailin İrana hücumlarında ABŞ-ın heç bir rolunun olmadığını dedi və Tehrana ABŞ-ın maraqlarını və şəxsi heyətini hədəf almamaq barədə xəbərdarlıq etdi.

Bununla belə, ABŞ prezidenti Donald Tramp dedi ki, İran razılaşma əldə etməlidir, əks halda gələcək hücumlar “daha ​​qəddar” olacaq.

Sonrakı günlərdə Tramp Türkiyə vaxtı ilə 22 iyun bazar günü səhər saatlarında “Truth Social”da paylaşım edərək, “İranda Fordov, Natanz və İsfahan da daxil olmaqla üç nüvə obyektinə çox uğurlu hücumumuzu tamamladıq. Artıq bütün təyyarələr İranın hava məkanından kənardadır”, – dedi.

Fordonu bombaladıqlarını bildirən Tramp, “Bütün təyyarələr sağ-salamat evlərinə qayıtdı. Böyük Amerika döyüşçülərimizi təbrik edirik. Dünyada bunu edə biləcək başqa ordu yoxdur. Bu mövzuya diqqət etdiyiniz üçün təşəkkür edirik”, – dedi.

İranın rəsmi xəbər agentliyi İRNA, “Üç nüvə obyektində radiasiyaya səbəb ola biləcək heç bir material yoxdur”, – dedi.

Hücumdan bir gün sonra İran ABŞ-ın Qətərdəki Əl Udeyd aviabazasına 19 raket atdı. Hadisə nəticəsində xəsarət alan olmadığı bildirildi.