Yaxın Şərqdə müharibə böyüdükcə gözlər Tehrana çevrilib. İsrail və ABŞ-ın hücumlarından sarsılan İranda ən çox danışılan sual “Ayətullah Əli Xameneyi haradadır?” sualıdır. Həftələrlə ictimaiyyətə görünməyən İranın dini lideri ilə bağlı iddialar olduqca təəccüblüdür.

İranda müharibə başlayandan bəri ictimaiyyətə görünməyən Ayətullah Əli Xameneyinin harada olduğu rəsmən açıqlanmayıb. Bununla belə, Amerika mətbuatı dini liderin bunkerdə gizləndiyini yazır. “The New York Times” qəzetinə danışan İran rəsmilərinin sözlərinə görə, Xameneyi mümkün sui-qəsdə qarşı elektron rabitəsini tamamilə kəsib və komandirləri ilə yalnız etibarlı vasitəçi vasitəsilə əlaqə saxlayır. Bildirilir ki, İranın dini lideri ona sui-qəsd olacağı təqdirdə onun xələflərini də müəyyən edib.

Amerika prezidenti Donald Tramp iyunun 17-də etdiyi paylaşımda Xameneyiyə qarşı hədələyici ifadələr işləmişdi: "Biz qondarma ali liderin harada gizləndiyini dəqiq bilirik. O, asan hədəfdir, amma orada təhlükəsizdir. Biz onu ən azından indi aradan götürməyəcəyik. Səbrimiz tükənir".

Bu hədədən sonra İsrail mediası Lavizandakı yeraltı qərargahın vurulduğunu iddia edib. İran bu iddianı nə təkzib, nə də təsdiqləyib. İsrailin müdafiə naziri İsrael Katz, “İranın simvollarını hədəf alırıq” deyərək, rejimin daxili təhlükəsizlik strukturuna birbaşa hücum edildiyini açıqlayıb.

***

Digər tərəfdən, İrandakı kəşfiyyatın zəifliyi də müzakirə mövzusudur. Yüksək vəzifəli məmurlar düşmənin ən həssas səviyyələrə sızdığını qəbul edirlər. Xüsusilə komandirləri hədəf alan sui-qəsdlərin artması qorxunu da artırıb. Bu səbəbdən İran hökuməti bütün yüksək vəzifəli şəxslərin gizli fəaliyyətə keçməsini tələb edib. Mülki və hərbi rəhbərlərə mobil telefonlardan istifadə qadağan edilib və internet böyük ölçüdə kəsilib.

***

Xameneyinin susqunluğu İran xalqında da rezonans doğurub. Tehran küçələrində etirazlar davam edərkən, dini liderin portretləri də gəzdirilir. Lakin bunkerdən gələn mesaj “İran xalqı məcburi müharibəyə təslim olmayacaq”, – mesajıdır.

Ekspertlərin fikrincə, Xameneyi 36 illik rəhbərliyinin ən kövrək dövrünü yaşayır. Həm daxili reaksiyalar, həm də xarici hücumlar İran rejimini küncə sıxışdırıb.