Türkiyə ilə Liviya arasında yeni neft əməkdaşlıq müqaviləsi Yunanıstan mətbuatında geniş işıqlandırılıb.

Liviya Milli Neft Şirkəti (NOC) dünən TPAO (Türkiyə Neft Şirkəti) ilə dörd dəniz bölgəsində geoloji və geofiziki tədqiqatların aparılması üçün anlaşma memorandumu imzaladığını açıqlayıb.

Liviya dövlət neft şirkətindən verilən açıqlamada, “İki ölçülü (10 min kilometr uzunluğunda) seysmik tədqiqatların aparılması və bu tədqiqatlardan əldə edilən məlumatların 9 aydan çox olmayan müddətdə işlənməsi ilə bağlı da müzakirələr aparılıb”.

Bu razılaşma Yunanıstan mətbuatında geniş işıqlandırılıb. Xəbərlərdə Yunanıstan hökumətinin razılaşma ilə bağlı narahatlığı qeyd olunub.

“Kathimerini” qəzeti, "Ankara Liviya sahəsində ABŞ-Türkiyə əhəmiyyətli balansını pozmamaq üçün yavaş-yavaş, metodik və diqqətlə irəliləyir”, – yazıb.

Müqavilənin Yunanıstan hökumətinin hazırkı enerji planlamasına təsir etmədiyini ifadə edən qəzet, "Qeyd etmək lazımdır ki, dünənki razılaşma Ankara ilə Tripoli arasında 2022-ci ilin oktyabrında imzalanmış karbohidrogen kəşfiyyatı və hasilatı sahəsində əməkdaşlıq haqqında Anlaşma Memorandumunun davamıdır və Türkiyə Memorandumunu müşayiət edən və altı dəniz milindən artıq səlahiyyətə sahib olmayan əsas xəritəyə uyğun olaraq hazırlanmışıb”, – yazıb.

***

Dünən Afinadakı müvafiq mənbələr Liviya neft şirkətinin dərc etdiyi xəritəyə əsasən ayrılmış ərazilərin orta xəttin cənubunda olduğunu bildirərək, heç bir halda Yunanıstanın suveren hüquqlarının pozulmasını qəbul etməyəcəyini bildirib.

“Naftemporiki” qəzeti əməkdaşlığın “təxribat xarakterli” olduğunu iddia edib.

“Etnos” qəzeti yazıb ki, bu halda Yunanıstanın xarici işlər naziri Giorgos Gerapetritisin Liviyaya səfər edib-etməyəcəyi mübahisəlidir.

Yunanıstanın baş naziri Kiriakos Mitsotakisin bu gün toplanacaq Avropa Şurasında Liviya məsələsini gündəmə gətirəcəyi gözlənilir.