Pekin administrasiyası Avropa Birliyinin (AB) Çin mənşəli oxşar məhsulların satışına tətbiq etdiyi məhdudiyyətlərə cavab olaraq, Avropa şirkətlərinin tibbi cihaz tenderlərində iştirakını qadağan etmək qərarına gəldiyini açıqlayıb.

Çin Maliyyə Nazirliyi tərəfindən edilən açıqlamada, Avropa mərkəzli şirkətlərin Çin hökumətinin büdcəsi 45 milyon yuanı (təxminən 6,28 milyon dollar) aşan tibbi cihaz alqı-satqısı üçün keçirdiyi açıq tenderlərdə iştirak edə bilməyəcəyi bildirilib.

Açıqlamada bu qərarın yalnız Çində istehsal etməyən Avropa şirkətlərini əhatə etdiyi, Çinə sərmayə yatıran və ölkədə istehsal edən şirkətlərin bu təcrübədən azad ediləcəyi, məhdudiyyətlərin həmin gündən qüvvəyə mindiyi bildirilib.

Çin Ticarət Nazirliyinin sözçüsü qərarla bağlı açıqlamasında vurğulayıb ki, Pekin AB ilə mövcud fikir ayrılıqlarını dialoq və məsləhətləşmələr yolu ilə həll etməyə hazır olduğunu dəfələrlə ifadə edib.

Sözçü, "Çin dəfələrlə ikitərəfli danışıqlarda xoşməramlılıq və səmimiyyət nümayiş etdirdi. Bununla belə, AB Çinin yanaşmasına məhəl qoymadan məhdudlaşdırıcı tədbirlər görməyə və yeni proteksionist maneələr qurmağa davam edir", – deyib.

AB Komissiyası iyunun 20-də Çin şirkətlərinin tibbi cihazlarla bağlı üzv ölkələrdə dəyəri 5 milyon avrodan çox olan dövlət tenderlərindən çıxarılması barədə qərar qəbul edildiyini açıqlayıb.