Ən azı doqquz ABŞ və beynəlxalq bank, ikinci rüb üçün gözləntilərdən daha yaxşı çıxan göstəricilərdən sonra Çinin 2024-cü il üzrə iqtisadi artım proqnozunu yüksəldib. Lakin analitiklər bu yüksəlişin növbəti aylarda zəifləyə biləcəyi barədə xəbərdarlıq edirlər.

“Morgan Stanley”, “Goldman Sachs Group Inc”. və “Barclays Plc” kimi nəhəng maliyyə qurumları Çinin ilin sonuna qədər ÜDM artım proqnozlarını 5 faizə yaxınlaşdırıblar. Avstraliya və Yeni Zelandiya Bankçılıq Qrupu (ANZ) isə 2025-ci il üçün artımın 5,1 faiz olacağını ehtimal edir.

Çinin rəsmi statistika qurumunun açıqladığı məlumata əsasən, ikinci rübdə iqtisadi artım 5,2 faiz təşkil edib ki, bu da “Bloomberg” sorğusundakı 5,1 faiz gözləntisini üstələyib. Bu nəticə ixracın davamlılığı və daxili istehlakla investisiyalara yönəlik dövlət dəstəyi sayəsində mümkün olub. İyunda sənaye istehsalı gözləntiləri aşıb, lakin pərakəndə satışlar bir qədər zəif çıxıb.

Bununla belə, iqtisadçılar ixracatda gözlənilən azalma və daxili bazarda istehlakçı inamının zəifliyi fonunda artımın davamlı olmayacağına işarə edirlər. Üstəlik, deflyasiya problemi dərinləşir – qiymət dəyişikliklərini əks etdirən nominal ÜDM artımı ikinci rübdə cəmi 3,9 faiz təşkil edib. Bu, 1993-cü ildən bu yana (pandemiya dövrü istisna olmaqla) ən aşağı göstəricidir.

“Morgan Stanley” analitiki Robin Ksinqin rəhbərlik etdiyi komanda çərşənbə günü yayımladığı hesabatda bildirib: “Çinin əsas makroiqtisadi problemi – deflyasiya davam edir”.

“Goldman Sachs” isə qeyd edir ki, ilin əvvəlindən bəri qeydə alınan sabit iqtisadi artım səbəbilə, Pekin qısa müddətdə genişmiqyaslı iqtisadi stimullar təqdim etməyə tələsmir. Onların salı günü paylaşdığı qeyddə vurğulanır: “Əmlak sektorundakı daralmanı dayandırmaq və əmək bazarındakı təzyiqləri azaltmaq üçün tədrici və hədəflənmiş yumşaldıcı addımlar atılacağı gözlənilir”.