Neft qiymətləri dünənki kəskin ucuzlaşmadan sonra bu gün səhər Asiya birjalarında yüngül bahalaşma göstərib. ABŞ xam nefti (WTI) 0,91% artaraq 58,80 dollar, “Brent” isə 0,89% yüksələrək 62,46 dollardan ticarət olunub.

Dünənki ucuzlaşma ABŞ və Hindistan arasında Rusiya neftinin idxalına dair təzyiqlər və bazarlardakı təklif artımı narahatlıqları səbəbindən son beş ayın ən aşağı səviyyələrinə düşmüşdü. ABŞ Prezidenti Donald Tramp Hindistanın Rusiya neftini alımını dayandırmağa razılaşdığını və eyni məsələ ilə Çin üzərində də təzyiq göstərəcəyini açıqladı.

Buna baxmayaraq, bazar hələ də təklif və tələbdəki qeyri-müəyyənliklərə həssasdır. Beynəlxalq Enerji Agentliyi (IEA) və OPEC+ istehsalın artmasının 2026-cı ildə qlobal neft istehsalını artıracağı barədə xəbərdarlıq etdilər. Bundan əlavə, ABŞ-Çin ticarət gərginlikləri və artan gömrük tarifləri tələbat gözləntilərinə mənfi təsir edir. ABŞ xam neft ehtiyatlarının artması isə qiymətlər üzərində təzyiq yaradır.