Almaniyada yaxın günlərdə qəfil hava dəyişiklikləri gözlənilir. Sinoptiklər bu vəziyyəti “soyuq şoku” adlandırır və bildirirlər ki, ölkə üzrə temperatur sürətlə aşağı düşəcək.

Vaxt.AZ xarici mediaya istinadən xəbər verir ki, proqnozlara görə, havanın temperaturu mövsüm normasından təxminən 8 dərəcə aşağı enəcək. Bəzi bölgələrdə gecələr 0°C-yə qədər düşəcəyi ehtimal olunur. Bu isə səhər saatlarında don və buzlanma riski deməkdir.

Soyuq hava ilə yanaşı, qalın duman və alçaq təbəqəli çən də müşahidə ediləcək. Xüsusilə ölkənin cənubundakı düzənlik bölgələrdə görmə məsafəsinin ciddi şəkildə azalacağı bildirilir.

Mütəxəssislər sürücüləri ehtiyatlı olmağa – duman faralarının açıq saxlanması və sürətin azaldılmasına çağırır.

Gələn günlərdə hava proqnozlarını izləmək, isti geyinmək və avtomobil idarə edərkən diqqətli olmaq tövsiyə edilir.