Amerika Birləşmiş Ştatlarının prezidenti Donald Tramp, hazırda maliyyə naziri olan Skott Bessentin Federal Ehtiyat Sistemi (FED) rəhbəri Cerom Pauellin yerinə təyin edilə biləcəyini, lakin onun hazırkı vəzifəsindəki uğuru səbəbilə ən güclü namizəd olmadığını bildirib.

Tramp bu açıqlamanı çərşənbə axşamı jurnalistlərin suallarını cavablandırarkən verib. Prezidentə Bessentin Pauellin mümkün varisi olub-olmadığı soruşulduqda, cavabı belə olub: “O, bir seçimdir və çox yaxşıdır”.

Jurnalistlərdən biri onun “ən yaxşı seçim” olub-olmadığını dəqiqləşdirmək istədikdə isə Tramp cavabında deyib: “Xeyr, deyil, çünki gördüyü işi bəyənirəm”.

Son aylarda FED rəhbəri Cerom Pauellin əvəzlənməsi ilə bağlı ehtimallar müzakirə edilir. Pauell, son dövrlər faiz siyasətində ehtiyatlı davranması və FED binasının “həddən artıq baha başa gələn” təmiri səbəbilə Trampın tənqid hədəfinə çevrilmişdi.

Bessentin özü nə düşünür?

Skott Bessent də həmin gün “Bloomberg Television”a müsahibəsində bildirib ki, Pauellin rəhbərlik müddəti 2026-cı ilin mayında başa çatdıqda, onun FED-də İdarə Heyətinin üzvü kimi fəaliyyətini davam etdirməsi uyğun olmaz.

“FED-ə rəhbərlik etməyən, amma İdarə Heyətinin üzvü kimi qalan keçmiş sədrin mövcudluğu bazarda çaşqınlıq yarada bilər”, – deyə Bessent bildirib.

“Kölgə FED rəhbəri kimi bir namizədin ortaya çıxması çoxlu spekulyasiyaya səbəb olacaq”.

Yeni ssenarilər: Hassett, Uorş və “sürpriz” namizəd

Məsələ ilə tanış mənbələrin “Bloomberg”ə verdiyi məlumata görə, Pauellin yerinə ən güclü namizəd hazırda ABŞ Milli İqtisadi Şurasının direktoru Kevin Hassett hesab olunur. Digər iddialı namizəd isə keçmiş FED üzvü Kevin Uorşdur.

Mənbələrin fikrincə, Bessent seçki prosesində müşavir kimi iştirak edir, lakin digər namizədlər razı salmasa, özünün namizədliyi aktuallaşa bilər.

Bütün bu ehtimalların fonunda hazırkı FED üzvü Kristofer Valler isə “sürpriz namizəd” olaraq müzakirə edilir.