Rusiyanın Baltik dənizində yerləşən əsas neft ixrac məntəqələrindən biri olan Primorsk portu Ukrayna pilotsuz uçuş aparatlarının hücumları nəticəsində anbar gücünün azı 40%-ni itirib.

VAXT.AZ “Reuters”ə istinadən xəbər verir ki, mart ayının sonunda çəkilmiş peyk şəkilləri nəticəsində limanda ən azı səkkiz böyük neft rezervuarının zədələndiyi müəyyən edilib. Hər bir rezervuarın tutumu 50 min kubmetr olub. 

Məlumata görə, Primorsk limanı Rusiyanın əsas ixrac qapılarından biri hesab olunur və gündə 1 milyon barelə qədər neft yükləmə imkanına malikdir. Zədələnmiş infrastruktur səbəbindən limanın fəaliyyətində ciddi məhdudiyyətlər yaranıb. 

Son həftələrdə Ukrayna pilotsuz uçuş aparatları Rusiyanın Baltik dənizi sahilində yerləşən digər böyük enerji obyektlərini, o cümlədən Ust-Luqa portu limanını da dəfələrlə hədəfə alıb. Bu hücumlar nəticəsində neft və yanacaq yükləmələri müvəqqəti dayandırılıb. 

Ekspertlərin hesablamalarına görə, son hücumlar Rusiyanın neft ixrac imkanlarına artıq təsir göstərib və mart ayında dəniz yolu ilə dizel ixracı azalma nümayiş etdirib.