Birləşmiş Millətlər Təşkilatı (BMT) ABŞ və İsrail ilə İran arasında başlayan müharibədən sonra Hörmüz boğazında tətbiq olunan məhdudiyyətlər səbəbindən gəmi keçidlərinin kəskin azaldığını açıqlayıb.

VAXT.AZ “Reuters”ə istinadən xəbər verir ki, BMT Baş katibinin sözçüsü Stefan Düjarrik gündəlik mətbuat konfransında bildirib ki, Birləşmiş Millətlər Təşkilatının Ticarət və İnkişaf Komitəsinin məlumatlarına əsasən, fevralın 28-dən etibarən boğazdan keçən gəmilərin sayı 95,3% azalıb.

Onun sözlərinə görə, tətbiq olunan məhdudiyyətlər nəticəsində əsas ərzaq məhsullarının qiymətləri 6%, Avropa üçün xam neft qiymətləri isə 53% artıb.

Bazar iştirakçıları Hörmüz boğazındakı fasilələrin uzanacağı ehtimalını qiymətlərdə nəzərə almağa davam edir. Hazırda “Brent” markalı neftin bir barreli 111 dollara çatıb. “Qərbi Texas” ABŞ xam neft isə 100 dollar səviyyəsində ticarət olunur.

Mütəxəssislər bildirir ki, boğazın səkkiz həftədən artıq müddətdə nəqliyyat üçün bağlı qalması və ABŞ-İran danışıqları ətrafındakı qeyri-müəyyənlik qiymətlərə yuxarı yönlü təzyiq göstərir. Müharibədən əvvəl qlobal neft və mayeləşdirilmiş təbii qaz axınının təxminən 20%-i Hörmüz boğazı vasitəsilə həyata keçirilirdi və fasilənin gözləniləndən daha uzun çəkə biləcəyi ehtimal olunur.

Məlumatlara görə, ABŞ Prezidenti Donald Tramp İranın Hörmüz boğazının açılması üçün nüvə danışıqlarının təxirə salınması ilə bağlı təklifinə müsbət yanaşmayıb.

ABŞ-ın bu təklifə ehtiyatla yanaşması və davam edən dəniz blokadasının təklifi məhdudlaşdıraraq qiymətləri dəstəklədiyi bildirilir. Analitiklər əlavə edirlər ki, aşağı ehtiyat səviyyələri və strateji rezervlərin yenidən doldurulması zərurəti yaxın dövrdə neft qiymətlərinin artımını davam etdirə bilər.