Rusiya hakimiyyəti daxilində Ukrayna müharibəsi, iqtisadi çətinliklər və artan daxili təzyiqlər fonunda ciddi fikir ayrılıqları formalaşmağa başlayıb.

VAXT.AZ “The Washington Post” qəzetinə istinadən xəbər verir ki, Kremlə yaxın mənbələrin məlumatına görə, prezident Vladimir Putin ətrafında toplanan müxtəlif güc mərkəzləri artıq ölkənin gələcəyi və müharibənin idarə olunması məsələsində fərqli mövqelər nümayiş etdirirlər.

Məqalədə əsas qarşıdurmanın Prezident Administrasiyasının rəhbər müavinlərindən biri olan Sergey Kiriyenkonun komandası ilə Federal Təhlükəsizlik Xidməti (FTX) arasında baş verdiyi göstərilir.

Qəzetin yaydığı təhlilə görə yazır ki, Kiriyenko qrupu vəziyyətin siyasi texnologiyalar, təbliğat və ictimai rəyin idarə olunması vasitəsilə nəzarətdə saxlanıla biləcəyini düşünür. Təhlükəsizlik strukturları isə daha sərt senzura, repressiyalar və internetə nəzarətin artırılmasını tələb edir.

Qəzetin mənbələri hazırkı vəziyyəti 1996-cı ildə, Boris Yeltsin dövründə yaşanan siyasi böhranla müqayisə edirlər. Həmin dövrdə də Kremlin daxilində müxtəlif qruplar arasında hakimiyyət uğrunda ciddi rəqabət müşahidə olunurdu.

Məqalədə qeyd olunur ki, Ukrayna müharibəsinin uzanması, iqtisadi problemlər və pilotsuz uçuş aparatlarının (PUA) hücumları Rusiya elitasında narahatlığı artırır. Nəşrin həmsöhbətlərindən bəziləri bildirirlər ki, hakimiyyət daxilində müharibəyə münasibət dəyişməyə başlayıb və bəzi dairələr onu artıq ümumi milli məqsəd deyil, Putinin şəxsi qərarı kimi qiymətləndirirlər.

Bununla belə, “The Washington Post” Kremlin yaxın zamanda dağılması və ya hakimiyyətin çökməsi ilə bağlı nəticə çıxarmır. Təhlildə əsas vurğu sistem daxilində gərginliyin və müxtəlif güc qrupları arasındakı rəqabətin artmasına yönəlib.

Qəzetin etirazların artmasına misal kimi Kremlin keçmiş tərəfdarlarından İlya Remeslo hadisəsini misal göstərir. Nəşr yazır ki, əvvəllər hakimiyyətə yaxınlığı ilə tanınan rusiyalı hüquqşünas və təbliğatçı Ilya Remeslo mart ayında açıq şəkildə Vladimir Putinin istefasını tələb edərək onu müharibə cinayətkarı adlandırmışdı. Bundan sonra Remeslo məcburi şəkildə Sankt-Peterburqdakı psixiatriya xəstəxanasına yerləşdirilmişdi. Bu yaxınlarda sərbəst buraxılan hüquqşünas Rusiya prezidentinə qarşı çıxışlarını davam etdirəcəyini bildirib.

Ekspertlər hesab edirlər ki, Kreml daxilində formalaşan fikir ayrılıqları yaxın aylarda Rusiyanın həm daxili siyasətinə, həm də Ukrayna müharibəsi ilə bağlı qərarlarına təsir göstərə bilər.