Böyük Britaniyanın Böyük Britaniyanın Kəşfiyyat, Kibertəhlükəsizlik Agentliyinin (GCHQ) rəhbəri Anne Kist-Batler bildirib ki, Ukraynada genişmiqyaslı müharibə başlayandan bəri təxminən 500 min Rusiya hərbçisi həlak olub. Bu rəqəm Britaniya kəşfiyyatının indiyədək səsləndirdiyi ən yüksək və ən açıq qiymətləndirmələrdən biri hesab olunur.

VAXT.AZ “The Guardian”a istinadən xəbər verir ki, Kist-Batler məlumatı Bletçli-Parkda keçirilən GCHQ-nun illik mühazirəsində açıqlayıb. O bildirib ki, yeni kəşfiyyat məlumatları Kremlin döyüş meydanında ciddi itkilər verdiyini göstərir və Vladimir Putin faktiki olaraq geriyə gedir.

Qəzet bildirir ki, bu, tammiqyaslı müharibə dövründə ilk dəfədir Britaniyanın yüksək vəzifəli rəsmisi açıq şəkildə yalnız ölən rus hərbçilərinin sayını səsləndirir. Əvvəlki Qərb qiymətləndirmələrinin əksəriyyətində ölənlərlə yanaşı yaralananlar da ümumi itki statistikalarına daxil edilirdi.

GCHQ rəhbərinin sözlərinə görə, hazırda Rusiya ordusu ayda təxminən 30 min ümumi itki verir. Bunun 15-20 mininin ölüm olduğu ehtimal edilir. Britaniya kəşfiyyatı hesab edir ki, Moskva aylıq 25-31 min yeni hərbçi cəlb etsə də, bu itkiləri tam kompensasiya etmir.

Kist-Batler çıxışında yalnız döyüş meydanındakı vəziyyətdən danışmayıb. O bildirib ki, Rusiya eyni zamanda Böyük Britaniya və Avropaya qarşı gündəlik hibrid əməliyyatların miqyasını artırır. Onun sözlərinə görə, əsas hədəflər dənizaltı kommunikasiya xətləri, kritik infrastruktur, kiberməkan, təchizat zəncirləri, demokratik institutlar və cəmiyyət daxilində etimaddır.

GCHQ rəhbəri qeyd edib ki, Britaniya xüsusi xidmət orqanları Rusiyanın Qərb texnologiyalarını qaçaqmalçılıq yolu ilə əldə etməsinin qarşısını almağa, kiberhücumları dəf etməyə və mümkün diversiya cəhdlərini neytrallaşdırmağa çalışır.

Maraqlıdır ki, Britaniya kəşfiyyatının açıqladığı rəqəm müstəqil araşdırmaların nəticələrindən xeyli yüksəkdir. “Mediazona” və BBC Rus xidməti açıq mənbələr, nekroloqlar və qəbiristanlıq məlumatları əsasında indiyədək 200 mindən çox rus hərbçisinin ölümünü adbaad təsdiqləyib. “Meduza” və “Mediazona”nın irs reyestrləri əsasında hazırladığı ayrıca hesablamada isə 2025-ci ilin sonuna qədər ölən rus hərbçilərinin sayının təxminən 352 min olduğu göstərilib.

Qərb analitikləri hesab edirlər ki, real itkilərin dəqiq hesablanması çətindir. Çünki Rusiya uzun müddətdir rəsmi statistikanı açıqlamır, itkin düşmüş kimi qeydə alınan hərbçilər isə bir çox hallarda ümumi siyahılara daxil edilmir. Bundan əlavə, Donetsk və Luqansk separatçı birləşmələrinin itkiləri də əksər beynəlxalq hesabatlarda ayrıca göstərilir.

Britaniya tərəfinin açıqlaması Ukraynada döyüşlərin intensivləşdiyi bir dövrdə səslənib. Son həftələr Ukrayna ordusu Krım və Rusiyanın arxa cəbhəsində pilotsuz aparat və uzaqmənzilli raket hücumlarını artırıb. “Sky News” və digər Britaniya nəşrləri yazır ki, Moskvanın irəliləyiş tempi zəifləyir və bəzi istiqamətlərdə Ukrayna qüvvələri 2023-cü ildən bəri ilk dəfə əraziləri geri qaytarmağa başlayıb.