«Növbəti ilin büdcəsində dövlət strukturlarında maaşların artırılması nəzərdə tutulsa da, bu, deputatlar üçün nəzərə tutulmayıb. Niyə belə ayrı-seçkilik qoyulur? Büdcədə dövlət strukturlarında çalışanların maaşlarının 20 faiz artırılması, yuxusunda nəsə görüb duranların məvaciblərinin qaldırılması nəzərdə tutulsa da, bu, Milli Məclisdə çalışanlara şamil olunmur».

Modern.az xəbər verir ki, bu sözləri Milli Məclisin ictimai birliklər və dini qurumlar komitəsinin sədri Siyavuş Novruzov bugünkü büdcə müzakirəsi zamanı deyib. O bildirib ki, Milli Məclisin illik büdcəsi cəmi 600-700 min manat civarında artırılır.

«Parlamentin illik büdcəsi heç bir rayonun büdcəsi qədər də deyil. Belə yanaşmaq olmaz. Axı bu gün qaçan da, qovan da Milli Məclisə üz tutur. Bu gün Milli Məclis yeganə qurumdur ki, bütün problemlərə sinə gərir. İstər xarici ölkələr, beynəlxalq təşkilatlar, istərsə də daxildə vətəndaşların problemi olsun».

Komitə sədri qeyd edib ki, parlamentin 50 ölkə ilə dostluq qrupu var, heç olmasa bu qruplarla iş aparmaq üçün ildə və yaxud 3 ildən bir görüş keçirilməlidir.

«Xarici dostluq qruplarına Azərbaycan haqqında məlumat verməliyik ya yox? Bu gün ölkəyə qonaqlar dəvət edilir. Səfərlər olur. Beynəlxalq təşkilatlarda Azərbaycana qarşı hücumların qarşısında deputatlar dayandığı halda, onların maaşı niyə artırılmır?»

S.Novruzov deyib ki, hazırda deputatın maaşı bir rayon məhkəmə sədrinin, polis rəisinin və prokurorun məvacibindən azdır.

«Bu gün hamı deputatın nə ilə dolandığını yaxşı hesablayır. Amma bilməliyik ki, bütün yük onların üzərinə düşür. Odur ki, deputatların da maaşı qaldırılmalıdır. Təkcə deputatların deyil, eyni zamanda parlamentin strukturunda çalışanların da maaşı qaldırılmalıdır».