Urmiyanın İran parlamentindəki millət vəkili Hadi Bahaduri hökumətin Urmu gölü böhranına laqeyd yanaşdığını deyib. O bu barədə «Təsnim» xəbər agentliyinə danışıb.

«Dövlət ötən il Urmiya gölünün canlandırılması üçün olduqca az məbləğdə vəsait ödədi. Bu məbləğ Urmiya Gölünü Bərpa Mərkəzi üçün nəzərdə tutulan büdcə vəsaitinin sadəcə 25 faizini təşkil edirdi. Nəticədə bir çox problem, o cümlədən bərpa layihələrinin dayandırılmasına şahid olduq.

Əgər büdcə vəsaiti ilə bağlı vəziyyət belə davam edəcəksə, o zaman gölün canlandırılması layihələri məğlubiyyətə uğrayacaq. Ona görə ki,  bu vəsaitlə nəzərdə tutulan layihələri icra etmək mümkün deyil. Urmiya gölünü bərpa etmək üçün birinci şərt vəsait məsələsidir», - deyə o vurğulayıb.

Azərbaycanlı millət vəkili büdcə vəsaitini təmin etmək üçün 3 çıxış yolu da göstərib. Onun fikrinə görə, məsələ ilə bağlı ölkənin dini liderinə müraciət etmək, Urmu gölünə yardım fondu təşkil edərək əhalidən vəsait yığmaq və ya xarici yatırımlardan istifadə etməklə maliyyə problemini aradan qaldırmaq mümkündür.

Qeyd edək ki, Urmiya Gölünü Bərpa Mərkəzinin rəsmiləri və Urmiyanın İran parlamentindəki millət vəkili Nadir Qazipurun sözlərinə görə, hazırda Urmu gölü sulu sahəsinin 97 faizdən çoxunu itirib, vəziyyət belə davam edərsə Güney Azərbaycanda 14 milyondan çox insanın həyatı ciddi təhlükə ilə üz-üzə qalacaq.