İyunun 4-də Xomeyninin ölümünün 33-cü ildönümü ilə eyni vaxtda Tehranda İranın ən böyük bankı olan Milli Bankda oğurluq hadisəsi baş verib. Oğrular bankda saxlanılan 250 depozit yeşiyini özləri ilə aparıblar.

İranın dövlət Televiziyası İran Milli Bankının ictimaiyyətlə əlaqələr bölməsinə istinadən xəbəri təsdiq edib və oğurların özlərindən sonra heç bir iz qoymadıqlarını açqlayıb.

Məlumatda oğruların peşəkar olduqları, bankı yaxşı tanıdıqları və bu səbəbdən bütün elektron sistemi kor edə bildikləri, müşahidə kameralarının mərkəzi yaddaş kartını özləri ilə apardıqları qeyd olunub.

Bankın ictimaiyyətlə əlaqələr bölməsi oğurluq həcminin böyük olduğunu bildirsədə, hələlik aparılan vəsaitin dəqiq məbləğinin hesablana bilmədiyini deyib.

İslahatçı qanada yaxınlığı ilə tanınan tanınmış jurnalist və media fəalı Abbas Əbdi oğurluqla bağlı sosial media hesabında paylaşım edib.

“Milli Bankın Universitet şöbəsindən oğurluq adicə qarət deyil. Bununla bağlı başqa ehtimalları nəzərə almaq lazımdır. Bu pul və qızıl oğurlamaqdan daha çox ölkənin milli təhlükəsizliyini hədəf almaqdır”, – deyə, Əbdi “Twitter” hesabında yazıb.