Vladimir Zelenski Donald Tramp və Ceyms Venslə mübahisədən bir neçə saat sonra “Fox News” studiyasında görünüb.

BBC-nin məlumatına görə, müsahibə aparıcı Bret Bayerin Zelenskinin Trampdan üzr istəyib-istəmədiyini soruşması ilə başladı. Nə “bəli”, nə də “xeyr” cavabı vermədən, o, ABŞ-a minnətdar olduğunu bildirdi.

“Bizdən daha çox müharibənin bitməsini istəyən yoxdur. Mən sadəcə deyirəm ki, biz Putini dayandırmaq üçün eyni tərəfdə olmalıyıq”, – deyə Zelenski bildirdi.

O, ABŞ-ın 40-cı prezidenti Ronald Reyqanın “Sülh sadəcə müharibənin olmaması deyil” fikrini xatırlatdı.

Aparıcı yenidən üzr istəyib-istəməyəcəyini soruşanda, Zelenski bunu rədd etdi: “Mən prezidentə və Amerika xalqına hörmət edirəm. Biz açıq və səmimi olmalıyıq. Mən elə bilmirəm ki, biz nəsə səhv etdik. Mediyaya hörmətim olsa da, bəzi məsələləri onlarsız müzakirə etməliyik”.

“Fox News”un “Siz müharibəni davam etdirmək istəyirsiniz, yoxsa sülh istəyirsiniz? Və Ağ Evə qayıtmaq şansınız olsaydı, geri dönərdinizmi”, – sualına Zelenski, “Əlbəttə, mən sülh istəyirəm. Nadir metallar üzrə razılaşma – sülhə və təhlükəsizlik zəmanətlərinə doğru ilk addımdır. Bizim ağır vəziyyətimiz var... Lakin mən əsgərlərə hörmət edirəm. Mən onlara “dayanın” deyə bilmərəm, çünki heç kim dayanmayacaq. Biz ədalətli və davamlı sülh istəyirik...”, – cavabını verib.

Zelenski qeyd etdi ki, ABŞ-la nəzərdə tutulan nadir metallar razılaşması təhlükəsizlik zəmanətləri üçün digər sazişlərə yol açmalı idi. Aparıcı isə ona etiraz edərək “Bu razılaşmada təhlükəsizlik zəmanətləri nəzərdə tutulmurdu” dedi. Zelenski isə cavabında “Amma bu, təhlükəsizlik zəmanətlərinin bir hissəsidir!” – deyə israr etdi.

Zelenski Tramp ilə münasibətlərinin xilas edilə biləcəyinə inandığını bildirdi: “Bəli, əlbəttə. Çünki bu, iki prezidentin deyil, xalqların münasibətidir. Biz Amerika xalqına minnətdarıq.”

Tramp və Venslə mübahisəsi haqda danışan Zelenski etiraf etdi ki, “bu, o qədər də yaxşı keçmədi.” O, müzakirələrin “çox həssas” olduğunu və sadəcə olaraq amerikalı həmkarları ilə səmimi olmaq istədiyini bildirdi.

Zelenski “böyük ABŞ tərəfdaşlarını” itirmək istəmədiyini vurğuladı və onu məyus edən məqamın ABŞ liderlərinin “Ukraynanın məhv olmaq üzrə olduğunu”, “ukraynalı əsgərlərin qəhrəman olmadığını” və “prezidentin diktator olduğunu” düşünmələri olduğunu qeyd edib.

Ukraynanın ABŞ-ın dəstəyi olmadan müharibədə qalib gələ bilməyəcəyini etiraf edən Zelenski, Avropanın Kiyevi maliyyələşdirməyə davam edəcəyinə inandığını bildirdi.

“Fox News”un “ABŞ-ın daimi dəstəyi olmadan Ukrayna Rusiyanı saxlaya biləcəkmi?” sualına “Bizim üçün çətin olacaq. Məhz buna görə buradayam” – deyə cavab verdi.

“Biz azadlığımızı itirə bilmərik. Ruslar torpaqlarımıza, evlərimizə gəliblər... Onlar o qədər insanı öldürdülər. Sadəcə unutmaq üçün? Sadəcə Putinin böyük biri olduğunu demək üçün? Xeyr, bu, bizsiz olsun”, – deyə Zelenski vurğuladı.

O, ABŞ-ın cari hərbi yardımını yetərsiz hesab etdiyini də bildirdi: “Biz ABŞ-dan kifayət qədər yeni dəstək görmürük, bütün hörmətimlə bunu deyirəm”.

ABŞ senatoru Lindsi Qrammin “artıq Zelenski ilə işləməyin mümkün olmadığı” barədə fikrinə cavab olaraq Zelenski bildirdi: “Amerikalılar ABŞ prezidentinə səs verirlər... və yalnız ukraynalılar da öz prezidentlərinə səs verirlər”.

“Bizdən daha çox müharibənin bitməsini istəyən yoxdur. Mən sadəcə deyirəm ki, biz ABŞ ilə birlikdə Putini dayandırmaq üçün eyni tərəfdə olmalıyıq”.

Zelenski sülh danışıqlarının baş tutacağına əmin olduğunu bildirdi. Onun fikrincə, bu danışıqlarda ABŞ, Ukrayna və Avropa ölkələri iştirak etməlidir.

“Ukrayna sülh istəyir və istənilən halda danışıqlar olacaq. Mən sadəcə olaraq qeyd etdim ki, bu, həqiqi və uzunmüddətli sülh olmalıdır. Və biz danışıqlar masasında güclü olmalıyıq. Danışıqlarda Ukrayna, ABŞ və Avropa iştirak etməlidir, və Ukrayna bu danışıqlara güclü şəkildə qatılacaq”, – deyə Zelenski bildirdi.