Almaniya iqtisadiyyatındakı yavaşlama Bavariya əyalətində həyəcan təbili çalır. Təkcə 2025-ci ilin yanvar-aprel ayları arasında ştatda 11,000 iş yerinin itirilməsi ilə 2025-ci il üçün artım gözləntiləri hələ də dayanıb. Bavariya İqtisadi Assosiasiyasının prezidenti Volfram Hatzın sözlərinə görə, bu vəziyyətin əsas səbəbləri ABŞ-ın tarifləri, aşağı investisiya faizləri və dövlət bayramlarının həddindən artıq olmasıdır. Hatz vəziyyəti yumoristik bir bənzətmə ilə yekunlaşdırdı: "Ağ pivə şüşəmiz hələ də kifayət qədər dolu deyil".

***

İqtisadiyyatı canlandırmaq üçün konkret təkliflər verən Hatz, iş dünyasının yenidən yüksəlməsi üçün iş saatlarının artırılması lazım olduğunu bildirib. "Daha çox iş, daha az tətil" çağırışı edən Hatz, rəsmi bayramların azaldılması ilə məhsuldarlığı artıracağını söyləyib.

“Vereinigte Bühnen Wien” (VBW) baş meneceri Bertram Brossardt da OECD-nin 2023-cü il məlumatlarına istinadən Almaniyanın dünyada ən aşağı illik orta iş saatına sahib olduğunu bildirib. 2023-cü ildə alman işçilər ildə orta hesabla 1343 saatla, Avstriyadan 92 saat, İsveçrədən 186 saat, İtaliyadan isə 391 saat az işləyiblər.

***

Bəzi dini bayramların ləğv edilə biləcəyini deyən Brossardt, “Pasxa bazar ertəsi, Pentikost bazar ertəsi, Milad bayramının ikinci günü. Fransız və italyan həmkarlarım bu günlərdə işləməməyimizə həmişə təəccüblənirlər. Bir günün ləğv edilməsi Almaniya iqtisadiyyatına böyük töhfə verəcək və işçilərə çox təzyiq göstərməyəcək”,  deyib. Brossardt, ən asan imtina edilən bayramın Pentikost olduğunu ifadə edərək, bu cür dəyişikliklərin bütün əyalətlərdə eyni vaxtda həyata keçirilməli olduğunu vurğulayıb.

Bavariya kimi mühafizəkar ştatlardakı kilsə və birliklərin bu təkliflərə qarşı çıxa biləcəyini xatırladanda Brossardt, “Əgər rəqabət qabiliyyətimizi artırmaq istəyiriksə, daha məhsuldar olmalıyıq”, – dedi.

***

Hatz və Brossardt həmçinin maksimum gündəlik iş saatının ləğv edilməsini və çevik həftə sisteminin tətbiqini təklif ediblər. Bu, işçilərə həftəlik saatlarını müxtəlif günlər üzrə bölüşdürməyə imkan verəcək.

Bundan əlavə, Hatz minimum əmək haqqının 15 avroya qaldırılmasına qarşı çıxıb və belə bir artımı dəstəkləməyən mövqe nümayiş etdirib. O, həmçinin vergilərin və elektrik enerjisinin qiymətlərinin aşağı salınmalı, şəbəkə haqları azaldılmalı və bürokratiyanın kökündən sadələşdirilməli olduğunu təklif edib. Hatzın sözlərinə görə, bu məqsədlərə nail olmaq üçün dövlət qulluqçularının işə qəbulu da dayandırılmalıdır.