Yaponiyanın paytaxtı Tokioda yay istisində “kondisionerdən istifadənin rahatlığını” təmin etmək üçün dörd ay ərzində ev təsərrüfatlarından su pulu üçün sabit ödəniş alınmayacaq.

Tokio Böyükşəhər Hökumətinin bildirdiyinə görə, yerli hökumət isti yay istilərinə qarşı ev təsərrüfatlarında "kondisionerdən istifadəni təşviq etmək" çərçivəsində sabit su ödənişindən imtina edəcək.

36,8 milyard yen (təxminən 256 milyon dollar) məbləğində əlavə büdcə təklifi bu "imtina kampaniyası" çərçivəsində çəkilən xərcləri ödəmək üçün iyun ayında Vilayət Şurasına təqdim ediləcək.

Tokio qubernatoru Koike Yuriko verdiyi açıqlamada, kampaniyanın bu yay üçün keçərli olacağını və insanların gündəlik həyatını “son dərəcə isti yay mövsümünə qarşı” qorumağı hədəflədiklərini söylədi.

Koike, “Qiymətlərin artması səbəbindən maaşların alıcılıq qabiliyyəti azalmaqda davam edir və son dərəcə isti yay proqnozu ilə biz Tokio sakinlərinə rahatlıq təmin etmək istəyirik”, – deyib.

***

Şəhərdəki ev təsərrüfatlarının su borularının diametrindən asılı olaraq 860 ilə 1460 yen arasında qənaət etməsi və şəhərdəki təxminən 8,2 milyon ev təsərrüfatının bu kampaniyadan faydalanması hədəflənir.

Adətən 2 santimetr diametrli su borularından istifadə edən ev təsərrüfatları 4 ay ərzində su hesablarına ümumilikdə 5000 yen qənaət edə biləcəklər. Sabit ödənişdən artıq olan sayğaclı su istifadəsinə görə ödəniş ediləcək.

İqlim dəyişikliyi səbəbiylə son illərdə yandırıcı yay istilərinin yaşandığı Tokioda hər il istidən ölümlər baş verir.