İranın “Münaqişə olarsa, Amerika bazalarını vuracağıq” bəyanatından sonra ABŞ Bağdaddakı səfirliyini boşaltmağa hazırlaşır. Digər tərəfdən, Tehran rəsmisi, bölgədəki dost bir ölkənin İsrailin mümkün hücumu ilə bağlı İrana xəbərdarlıq etdiyini açıqlayıb.

İran və ABŞ arasında nüvə gərginliyi artmaqdadır.

İranın müdafiə naziri Əziz Nəsirzadə dünən deyib ki, nüvə danışıqları və ya Vaşinqtonla münaqişə yaranarsa, Tehran ABŞ-ın regiondakı bazalarına zərbələr endirəcək.

Tehranın bəyanatından sonra ABŞ-ın Bağdad səfirliyini boşaltmağa hazırlaşdığı xəbəri yayılıb.

Ağ Evin mətbuat katibinin müavini Anna Kelli təxliyə xəbərini təsdiqləyərək, “Dövlət Departamenti ABŞ-ın xaricdəki personalının statusunu mütəmadi olaraq nəzərdən keçirir və bu qərar son araşdırmadan sonra qəbul edilib”, – deyib.

Bildirilib ki, ABŞ-ın müdafiə naziri Pit Heqset də Yaxın Şərqdəki şəxsi heyət ailələrinin təxliyəsini təsdiqləyib.

Hegset, “Yaxın Şərqdə inkişaf edən gərginliyi izləyirik” deyərək, bölgədə yerləşən ABŞ əsgərlərinin ailələrinin könüllü şəkildə ölkəni tərk etməsinə razılıq verdiyini təsdiqləyib.

***

“The Associated Press” xəbər agentliyinin məlumatına görə, ABŞ Bəhreyn və Küveytdəki qeyri-vacib diplomatik personalı və ailələri təxliyə etməyə hazırlaşır.

Bundan başqa, ABŞ-ın Bağdaddakı səfirliyi Amerika vətəndaşlarına İraqa səfər etməməyi tövsiyə edib.

***

“Reuters”in məlumatına görə, İraq mənbələri təxliyə tələb edəcək hər hansı təhlükəsizlik vəziyyətini müəyyən etmədiklərini bildiriblər.

İranın yüksək rütbəli təhlükəsizlik rəsmisi də “İran Basin TV”yə deyib ki, ABŞ personalının çıxarılması təhdid mesajı deyil.

***

İranın yüksək rütbəli rəsmisi “Reuters” agentliyinə deyib ki, regional gərginliyin artması İranın ABŞ ilə bazar günü nüvə danışıqlarına təsir etmək məqsədi daşıyan psixoloji müharibədir.

Rəsmi həmçinin bölgədəki dost bir ölkənin İsrailin mümkün hücumu ilə bağlı İranı xəbərdar etdiyinə diqqət çəkərək, “Bölgədə gərginliyin artmasına baxmayaraq, İran uranı zənginləşdirmək hüququndan əl çəkməyəcək”, – deyib.

Amerikanın “NBC News” telekanalına danışan mənbələr həmçinin bildiriblər ki, İsrail ABŞ-ın dəstəyi olmadan İrana hərbi hücumu nəzərdən keçirir.