İranın xarici işlər naziri Abbas Araqçı deyib ki, İran İsraillə 12 günlük silahlı münaqişə zamanı özünü müdafiə etmək qabiliyyətini nümayiş etdirib və sübut edib. Araqçı deyib ki, Tehran ABŞ-dan İrana bir daha hücum etməyəcəyinə dair zəmanət alan kimi Vaşinqtonla danışıqlara qayıdacaq.

İranlı nazir Abbas Araqçi ABŞ-ın “CBS News” telekanalına müsahibəsində İran və ABŞ arasında davam etdirilməsi gözlənilən nüvə danışıqları ilə bağlı açıqlamalar verib: “Danışıqların o qədər tez bərpa olunacağını düşünmürəm. Yenidən danışıqlara qərar verməmiz üçün ilk növbədə danışıqlar zamanı ABŞ-ın bizə bir daha hərbi hücum etməyəcəyinə dair zəmanət almalıyıq. Bütün bu məsələləri nəzərə alsaq, qərar vermək üçün hələ vaxt lazımdır”.

***

Araqçının sözlərinə görə, İsraillə 12 günlük silahlı münaqişə zamanı İran özünün müdafiə qabiliyyətini nümayiş etdirib və sübut edib. Araqçı, “Bizə qarşı hər hansı təcavüz olarsa, bunu davam etdirəcəyik”, – deyib. ABŞ-la münaqişənin sülh yolu ilə həlli mümkün olub-olmadığını soruşduqda Araqçı diplomatiyanın qapılarının heç vaxt tam bağlanmayacağını bildirib: “Zənginləşdirmə texnologiyasını və biliyi bombalarla aradan qaldıra bilməzsiniz. Nə qədər ki, bu iradə və bu sektorda bir daha irəliləyiş əldə etmək iradəsi var, biz tez bir zamanda dəymiş ziyanı bərpa edə və itirilmiş vaxtı kompensasiya edə bilərik... Bizim dinc nüvə proqramımız milli qürur və şərəf məsələsinə çevrilib”.

Ötən həftə ABŞ prezidenti Donald Tramp ABŞ və İranın gələn həftə nüvə danışıqlarına başlayacağını açıqlamışdı. Daha sonra ABŞ-da yerləşən “NBC News” xəbər verdi ki, ABŞ prezidentinin xüsusi nümayəndəsi Stiv Vitkoff yaxın günlərdə potensial nüvə sazişi ilə bağlı İran nümayəndələri ilə məsləhətləşmələr aparacaq. Danışıqlarda İranın uranın zənginləşdirilməsini dayandırması müqabilində ABŞ-ın İrana qarşı sanksiyalarını yumşaltması müzakirə olunacaq.

Aprel və may aylarında İran və ABŞ rəsmiləri nüvə proqramı ilə bağlı danışıqlar aparıb, məsləhətləşmələrin beş mərhələsi keçirilib. Lakin İsrailin İrana hücumları səbəbindən danışıqlar prosesi dayandırılıb.