İsrailin baş naziri Benyamin Netanyahu ABŞ prezidenti Donald Trampla görüşmək üçün Vaşinqtona gedib. Səfərdən əvvəl İsrail mətbuatında yer alan xəbərlər İrana qarşı yeni hücum ehtimalını gündəmə gətirib.

“Jerusalem Post”un yazdığına görə, Netanyahu ABŞ prezidenti Donald Trampdan İranın nüvə proqramını bərpa etmək fəaliyyətinə qarşı hərəkətə keçmək üçün yaşıl işıq istəyəcək.

“Məqsəd Livandakı vəziyyətə bənzər icazə almaqdır” deyən bir İsrail mənbəsi qəzetə bildirib: “Beləliklə, nüvə obyektlərində şübhəli fəaliyyət aşkar edilərsə və ya ABŞ və İsrailin vurduğu ərazilərdən uranın daşınmasına dair sübutlar olarsa, buna qarşı tədbir görmək üçün əvvəlcədən ABŞ-ın icazəsi alınacaq”.

Məlumata görə, İsrailin məqsədi İranın nüvə proqramını yenidən qurmasının qarşısını almaq üçün ABŞ-ın rəhbərlik etdiyi mexanizm yaratmaqdır. “Biz həmçinin İranın Atom Enerjisi üzrə Beynəlxalq Agentlik ilə əməkdaşlıq etmədiyinə görə geri qaytarılan sanksiyalar mexanizminin tətbiq olunmasını istəyirik”, – deyə rəsmi bildirib.

İran prezidenti Məsud Pezeşkian ötən həftə agentliklə əlaqələri dayandıran fərman imzalayıb. Nüvə müfəttişləri də təhlükəsizlik səbəbi ilə İranı tərk etdiklərini açıqlayıblar.

Bu gün Vaşinqtona gələn Netanyahu İsraili tərk etməzdən əvvəl jurnalistlərə deyib ki, “Biz İranın bizim məhv etmək məqsədi daşıyan nüvə silahı əldə etmək məqsədinə və bunu bərpa etmək cəhdlərinə qarşı ayıq qalmalıyıq”.