Fransada əhalisi 500 nəfərdən az olan bir bələdiyyənin meri ayda təxminən 1400 avro xalis maaş alır. Heç bir əlavə iş görməyən bələdiyyə sədri üçün bu rəqəm kifayət qədər aşağıdır. Yeni tənzimləmə bu əmək haqqını 8% artıraraq təxminən 1512 avroya çatdıracaq.

Əhalisi 100 mindən çox olan bələdiyyə sədrlərinin maaşı cəmi 1,4 faiz artırılacaq. Ona görə də böyük şəhərdə bələdiyyə sədrinin maaşı 5500-6000 avro civarında olduğu halda, artım cəmi 80-100 avro olacaq.

***

Bir çox bələdiyyə sədrləri maaş artımını əhəmiyyətsiz hesab edirlər. Onlar artım əvəzinə səlahiyyət və hörmət tələb edirlər. Yonne Bələdiyyə Başçıları Assosiasiyasının prezidenti Mahfoud Aomar, “Biz bunu maaş üçün etmirik. Bu maaşa bu yükü heç kim daşımazdı. Qərarlarımızda daha azad və hörmətli olmaq istəyirik”, – deyib.

Montolon Bələdiyyə sədri Fernando Dias Goncalves, “Sabah mənə sıfır maaş versələr, yenə də bələdiyyə sədri olardım”, – deyib. Bələdiyyə başçılarının çoxu öz pensiyaları ilə yaşayır və ya başqa işlərlə də məşğul olurlar, çünki təkcə bələdiyyə sədrinin maaşı kifayət etmir.

La-Belyol Bələdiyyəsinin sədri Loyk Barret özəl sektorda işləməyin və bələdiyyə sədri kimi xidmət etməyin əhəmiyyətli çətinliyini izah etdi. Səhər saat 5-dən axşam 9-a kimi işləməli olduğunu deyir. Aylıq 1400 avro maaş üçün.

Yeni qanun bələdiyyə sədrlərinin səlahiyyət müddəti bitdikdən sonra iş tapmasını asanlaşdırmaq üçün “peşəkar sertifikat” verəcək. Lakin bir çox sədrin fikrincə, bu tənzimləmə əsl problemi həll etmək üçün kifayət etməyəcək.